Թիվ 49 հիմնական և թիվ 87 միջնակարգ դպրոցներն անվանակոչվեցին քանդակագործ-մոնումենտալիստ Արա Հարությունյանի և հայ բարերարների անունով
Ավագանու որոշմամբ՝ Երևանի քաղաքի էրեբունի վարչական շրջանի համար 49 հիմնական դպրոցը անվանակոչվեց ականավոր քանդակագործ-մոնումենտալիստ Արա Հարությունյանի, իսկ թիվ 87 միջնակարգ դպրոցը՝ բարերարներ Յակոբ և Լուտովիկա Այնթապլեանների անվամբ:
Քաղաքապետարանի աշխատակազմի հանրակրթության վարչության պետի պաշտոնակատար Կարեն Սարգսյանը նշեց, որ 49 հիմնական դպրոցը քանդակագործ Արա Հարությունյանի անվամբ անվանակոչելու վերաբերյալ միջնորդություն է ներկայացրել քանդակագործի դուստրը՝ Սուսաննա Հարությունյանը:
Կարեն Սիմոնյանի խոսքով՝ Արա Հարությունյանը հանդիսանում է Մայր Հայաստան հուշարձանի հեղինակը, նրա հայտնի աշխատանքներից են Սայաթ-Նովայի հուշաղբյուրը, Կոմիտասի հուշարձանը և Կոմիտասի մահարձանը: Նա 40-ից ավելի հուշահամալիրների, հուշարձանների, մոնումենտների հեղինակ է, որոնք գտնվում են Հայաստանում, Ռուսաստանում, Ֆրանսիայում, Իտալիայում, Ֆիլիպիններում և այլուր:
Կարեն Սարգսյանն, անդրադառնալով համար 87 միջնակարգ դպրոցին, ընդգծեց, որ Ամերիկայի Միացյալ Նահանգների քաղաքացիներ Յակոբ և Լուտովիկա Այնթապլեանները ցանկություն են հայտնել հիմնանորոգելու Ավան վարչական Խուդյակովի փողոցի 44 հասցեում գտնվող «Երևանի համար 87 միջնակարգ դպրոց» ՊՈԱԿ-ը: Այդ նպատակի համար՝ որպես նվիրաբերություն միանվագ փոխանցել են 500 000 ԱՄՆ դոլար գումար: Միաժամանակ նվիրաբերողները ցանկություն են հայտնել դպրոցն անվանակոչելու իրենց անվամբ:
«Հակոբ Այնթապլեանը ԲԴԽ գիտությունների դոկտոր և պրոֆեսոր է, անդամակցում է Նյու Յորքի գիտությունների ակադեմիային: 1988 թվականի դեկտեմբերի 7-ի երկրաշարժից հետո զգալի աջակցություն է տրամադրել երկրաշարժից տուժածներին: Այնթապլեանները ակտիվորեն մասնակցում և օժանդակում են ամերիկահայ համայնքի հասարակական ու մշակութային կյանքին»,- ասաց Սարգսյանը:
«Իմ քայլը» խմբակցության ավագանու անդամ Լևոն Զաքարյանը հետաքրքրվեց. «Ճի՞շտ հասկացա, որ այդ մարդիկ պայմանով են տալիս գումարը, որ դպրոցը անվանակոչվի իրենց անունով հայկառակ դեպքում չեն տա գումար»: Կարեն Սարգսյանը հաստատեց, որ այդպես է:
Ավագանու անդամ Սերգեյ Գյոզալյանն էլ նշեց, որ այլ իրավիճակ է,երբ բարեգործություն անողը պայման է դնում, որ այսքան գումար կծախսի, բայց կրթական հաստատությունը պետք է կոչվի իր անունով:
Քաղաքապետ Հայկ Մարությանը նշեց, որ իր համար կարևորագույն խնդիր է բոլոր դպրոցների, մանկապարտեզների հիմնանորոգումը և պետք է օգտագործել բոլոր հնարավորությունները դա անելու համար: