Մեղրիով որևէ տարածք, որը կպատկանի Թուրքիային կամ Ադրբեջանին, չի տրվելու․ նոյեմբերի 9-ի հայտարարությունում հստակ նշված է, որ պետք է ապաշրջափակվեն սահմանները և նոր ենթակառուցվածքներ կառուցվեն․ Գորգիսյան
Այս քառօրյայում երկրորդ ընթերցմամբ ընդունվեց մեր նախաձեռնած օրենքի փոփոխությունների նախագիծը, որով զինծառայողների տարիքային սահմանափակումները փոփոխվեցին, և այն քաղաքացիները, որոնք ցանկանում էին մասնակցել իրենց համայնքի կամ այլ տեղամասի պահպանությանը, բայց տարիքը չէր ներում, այս փոփոխություններից հետո արդեն կարող են դիմել։ Այս մասին ԱԺ խմբակցությունների ճեպազրույցի ժամանակ ասաց «Լուսավոր Հայաստան» խմբակցության քարտուղար Գևորգ Գորգիսյանը։
Լրագրողների այն հարցին, թե ինչ գնահատական ունի՝ ԵԽԽՎ լիագումար նիստում հայ գերիների հարցի ներառմանը Ադրբեջանի և Թուրքիայի պատվիրակների հետ մեկտեղ ռազմավարական դաշնակից ՌԴ-ի պատվիրակների դեմ քվեարկելուն, Գորգիսյանը պատասխանեց․ «ԵԽԽՎ պատվիրակությունը շուտով կվերադառնա և ամբողջ գործընթացի վերաբերյալ հանդես կգա ընդգրկուն ասուլիսով։ Կարծում եմ՝ դրան կա բացատրություն, և նրանք անպայման կանդրադառնան այդ հարցին»։
Անդրադառնալով Թուրքիայի տրանսպորտի նախարարի այն հայտարարությանը, որ սկսվել է Ադրբեջանով դեպի Նախիջևան երկաթգծի կառուցումը և հարցին՝ հնարավոր է, որ կա արդեն որոշակի պայմանավորվածություն կողմերի միջև այս հարցի հետ կապված, Գորգիսյանը պատասխանեց․
«Կարևոր է տարանջատել՝ ինչ է նշանակում միջանցք և ինչ է նշանակում ճանապարհների ապաշրջափակում։ Միջանցք է, օրինակ՝ Լաչինի միջանցքը, որը մեզ է պատկանում։ Մեղրիով որևէ տարածք, որը կպատկանի Թուրքիային կամ Ադրբեջանին, չի տրվելու։ Նոյեմբերի 9-ի հայտարարության մեջ հստակ նշված է, որ պետք է ապաշրջափակվեն սահմանները և նոր ենթակառուցվածքներ կառուցվեն։ Դրա համար փոխվարչապետերի աշխատանքային խումբ է ստեղծվել։ Հետևաբար՝ այս երկուսը իրար հետ խառնել չի կարելի։ Փաշինյանը այդ համաձայնագրով արդեն տվել է իր համաձայնությունը, որ այդ ճանապարհները պետք է աշխատեն։ Ես վստահ եմ, որ դրանք լինելու են Հայաստանի սուվերենության ներքո»։
Գևորգ Գորգիսյանը մտահոգիչ համարեց Արցախի ԱԻՊԾ տնօրենի տեղակալի պաշտոնից Բորիս Ավագյանի ազատումը՝ նշելով, որ դա արդեն օրինաչափ երևույթ է դարձել։ «Ավագյանի խոսքում ես նկատեցի քաղաքական չեզոքության խախտում, նա ընդամենը գնահատական տվեց։ Ես կասկածում եմ, որ դա պաշտոնական դիրքի չարաշահում էր»։
Ամփոփելով խոսքը՝ Գորգիսյանը նշեց, որ «Լուսավոր Հայաստանը» այս պահին որևէ քաղաքական ուժի հետ բանակցություն չունի, ընտրություններին մասնակցելու են միայնակ և խոստացավ, որ իրենք՝ որպես ընդդիմադիր ուժ, ընտրություններից հետո ո՛չ թույլ են տալու, որ Փաշինյանը վերարտադրվի, ո՛չ էլ նպաստելու են նախկինների վերադարձին։