Իսրայելի հատուկ ծառայություններ․ Վիեննայում բանակցությունների արդյունքում ԱՄՆ-ը կվերադառնա Իրանի միջուկային գործարքին
Վիեննայում Իրանի եւ աշխարհի մյուս տերությունների միջեւ բանակցությունները ԱՄՆ-ին կբերեն 2015-ի միջուկային համաձայնագրին: Այս մասին Ազգային անվտանգության կաբինետի նիստում ասել են Իսրայելի ռազմական հետախուզությունը եւ Մոսադի բարձրաստիճան պաշտոնյաները, որոնք ներկա են եղել հանդիպմանը:
Իսրայելի կառավարությունը խիստ մտահոգված է միջուկային գործարքին ԱՄՆ-ի վերադառնալու կապակցությամբ եւ փորձում է համոզել Ջո Բայդենի վարչակազմին չթուլացնել ճնշումը Թեհրանի վրա:
«Մոսադը» նախարարների կաբինետին հիմնականում տեղեկացրել է իրանական միջուկային ծրագրի վիճակի մասին: Ռազմական հետախուզության ներկայացուցիչները քննարկել են տարածաշրջանում Իրանի գործողությունները:
Երկու հետախուզական գործակալությունները նման գնահատականներ են տվել Վիեննայի բանակցություններին:
«Մենք, մեղմ ասած, շատ լավատես չենք»,- ասել է հանդիպմանը մասնակցած իսրայելցի բարձրաստիճան պաշտոնյան: «Մենք չենք զարմանա, եթե ԱՄՆ-ն ու աշխարհի մյուս տերությունները մի քանի շաբաթվա ընթացքում Իրանի հետ գործարք կնքեն»:
Ազգային անվտանգության հարցերով խորհրդական Ջեյք Սալիվանը նախորդ օրը Fox News-ին ասել էր, որ Վիեննայում Իրանի հետ բանակցությունները «կառուցողական» են, 2015-ի միջուկային գործարքին վերադառնալու իրական փորձեր են արվում:
Սալիվանը հավելել է, թե ԱՄՆ-ը չի վերացնի պատժամիջոցները, քանի դեռ «հստակություն եւ վստահություն» չունի, որ Իրանը լիովին կվերադառնա 2015-ի համաձայնագրով նախատեսված իր բոլոր պարտավորություններին:
Իսրայելցի պաշտոնյաները հայտնել են, որ կառավարության նոր նիստում քաղաքական նոր որոշումներ չեն կայացվել, եւ Իսրայելը կշարունակի Իրանի հետ բանակցությունների վերաբերյալ երկխոսությունը Բայդենի վարչակազմի հետ:
Առաջիկա երկու շաբաթվա ընթացքում Իսրայելի ազգային անվտանգության հարցերով խորհրդական Մեյր Բեն Շաբբատը, ՑԱԽԱԼ-ի շտաբի պետ Ավիվ Կոհավին, իսրայելական ռազմական հետախուզության ղեկավար Թամիր Հեյմանը եւ «Մոսադի» տնօրեն Յոսի Կոհենը կայցելեն Վաշինգտոն՝ իրանցի գործընկերների հետ բանակցելու համար: