«Ինձ ցնցել էր իմ ու Միշել Օբամայի ընկերության վերաբերյալ հանրության արձագանքը»․ Ջորջ Բուշ կրտսերը՝ իր և նախկին առաջին տիկնոջ ջերմ հարաբերությունների մասին
ԱՄՆ-ի նախկին նախագահ Ջորջ Բուշ կրտսերը CBS News-ին տված հարցազրույցում հայտնել է, որ ամերիկացիները թերահավատորեն և զարմանքով են վերաբերվում այն հանգամանքին, որ տարբեր կուսակցությունների անդամները, ինչպես ինքը և նախկին առաջին տիկին Միշել Օբաման, կարող են մտերիմ ընկերներ լինել։
Ջորջ Բուշ կրտսերի և Միշել Օբամայի ջերմ հարաբերությունները ամերիկացիների շրջանում շփոթմունք էին առաջացրել 2016-ին Սմիթսոնյան աֆրիկյան պատմության և մշակույթի ազգային թանգարանում զույգի գրկախառնությունից հետո։
«Ինձ ցնցել էր իմ ու Միշել Օբամայի ընկերության վերաբերյալ հանրության արձագանքը»,-հայտնել է երկրի 43-րդ նախագահը։
ԱՄՆ նախկին առաջին տիկինը տարիների ընթացքում նույնպես մեծ հարգանքով է խոսել Ջորջ Բուշ կրտսերի մասին՝ նշելով, որ «թեև տարբեր կուսակցությունների անդամներ են, կիսում են միևնույն արժեքները»։
Նշենք, որ Օբամաները Դեմոկրատական կուսակցության անդամներ են, իսկ Ջորջ Բուշ կրտսերը՝ Հանրապետական։