Պակիստանում արմատականներն իրենց կուսակցության առաջնորդի ձերբակալման ֆոնին պատանդ են վերցրել 6 ոստիկանի
Պակիստանի ոստիկանությունը տեղեկացրել է, որ «Թեհրեք է Լաբիքե Պակիստան» իսլամական արմատական կուսակցության առաջնորդի ձերբակալությանը հաջորդած մեկ շաբաթ տևած բախումներից հետո, աջակողմյան ուժերը Լահորում պատանդ են վերցրել իրավապահ մարմնի 6 աշխատակցի, հայտնում է Al Jazeera լրատվականը։
Անցյալ շաբաթ Պակիստանի կառավարությունն արգելել է «Թեհրեք է Լաբիքե Պակիստան» կուսակցության գործունեությունը, այն բանից հետո, երբ խմբավորման առաջնորդ, գիտնական Սաադ Ռիզվիի ձերբակալությանն ի պատասխան նրա աջակիցները դուրս էին եկել փողոց՝ բողոքի ակցիաներ իրականացնելու։
Իրավապահ մարմնի աշխատակիցներին պատանդ են վերցրել Նավանքոթի ոստիկանական բաժանմունքի վրա տեղի ունեցած հարձակման ընթացքում։ Փանջաբի նահանգային ոստիկանության հայտարարության մեջ ասվում է, որ հարձակվողները զինված են եղել բենզինային ռումբերով և առևանգել են 50 հազար լիտր բենզին տեղափոխող մեքենա։
Հարձակմանն ի պատասխան ոստիկանությունը գործոողություն է սկսել խմբի դեմ։
Ինչպես ավելի վաղ տեղեկացրել էինք, Պակիստանի կառավարությունը ժամանակավորապես արգելափակել է ինտերներտ կապը երկրի այն շրջաններում, որտեղ բախումներ են ընթանում՝ ներքին անվտանգությունն ապահովելու նպատակով։
Կառավարության նման որոշման պատճառը «Թեհրեք է Լաբիքե Պակիստան» իսլամական արմատական կուսակցության կողմնակիցների և ոստիկանության միջև այս շաբաթ տեղի ունեցած բախումների հետևանքով առաջացած անկայուն վիճակն է։
Իշխանության տվյալներով` սպանվել է առնվազն 4, վիրավորվել մի քանի հարյուր մարդ։
Պակիստանում կուսակցության և կառավարության միջև բախումների վերածված լարվածությունն սկսվել է այն բանից հետո, երբ կուսակցությունը պահանջել է իրականացնել, ֆրանսիացի դեսպանորդին երկրից վտարելու վերաբերյալ փետրվարին տված խոստումը, ինչը կապված է Մուհամմեդ մարգարեի ծաղրանկարը տարածելու հետ։