Փաշինյանի հետ հանդիպումներին վարչական ռեսուրս է օգտագործվում, երբ երեխաներին բերում են հանդիպումների. նրա կիրառած քաղաքական տեխնոլոգիաները չեն աշխատելու հօգուտ իրեն․ Արմեն Բադալյան
Վարչապետի այցերի ընթացքում միանշանակ կիրառում են քաղաքական տեխնոլոգիաներ, բայց կարող ենք նշել՝ շատ հաճախ այդ հնարքները չեն աշխատելու հօգուտ իրեն: Այս մասին Tert.am-ի հետ զրույցում ասել է քաղտեխնոլոգ Արմեն Բադալյանը՝ անդրադառնալով ՀՀ վարչապետ Նիկոլ Փաշինյանի մարզային այցերին:
«Հիմա մենք հստակ չենք կարող տարաբաժանել, սա ընտրարշավ է, թե վարչապետի ամենօրյա գործունեություն, քանի որ մարզեր այցելությունը ևս նրա աշխատանքի բաղկացուցիչ մասն է: Սա հանդիպում էր քաղաքացիների հետ, զանգվածային-կազմակերպչական քաղտեխնոլոգիաներ են, որը բավականին նորմալ է, բայց նրա կիրառած միջոցները հաջողություն չեն բերելու»,- ասաց Արմեն Բադալյանը:
Նա նաև իր խոսքում անդրադարձավ մարզային այցերի ժամանակ երեխաների մասնակցությանը և նշեց՝ դա բացասական ազդեցություն է ունենալու բուն ընտրությունների ժամանակ:
«Օրինակ՝ նա երեխաներին բերում է և դիմացի շարքերում շարում, բայց դրանով նա լրացուցիչ ձայներ չի ստանում, այլ հակառակը»,- նշեց նա:
Քաղտեխնոլոգը նաև ընդգծեց՝ տեխնոլոգիաների ոչ ճիշտ կիրառման դեպքում շատ հնարավոր է վնասը լինի ավելի շատ, քան օգուտը:
«Շատերն այդ երևույթին բացասական են վերաբերում, և օրինակ այն մարդիկ, որոնք չեն որոշել՝ ում են քվեարկել առաջինը՝ տեսնելով այդ ամենը իրենց քվեն չեն տա վարչապետ Նիկոլ Փաշինյանին: Վարչական ռեսուրս է օգտագործվում, երբ երեխաները գալիս են հանդիպումների, քանի որ չեմ կարծում՝ առավոտվանից սպասում են վարչապետին»,- ընդգծեց քաղտեխնոլոգը:
Արմեն Բադալյանը հավաստմամբ՝ այս բացերը կարող են օգտագործել հակառակորդները ի օգուտ իրենց և ընդգծեց՝ վարչապետի մոտ այս այցերի ընթացքում կա ակնհայտ վախ:
«Մյուս կողմին անդրադառնլով կարող ենք ընդգծել՝ երբեք չի նշվում՝ որ համայնքն են գնալու, այսինքն գաղտագողի կերպով են գնում, իսկ դա նշանակում է՝ կա վախ, իսկ մրցակիցները կարող են օգտագործել այդ վախը:Կա բովանդակային խնդիր մարզեր այցելելիս, երբ խոստումներ է տալիս, քանի որ ժողովուրդը հստակ կարող է ասել՝ ինչ ես արել 3 տարիների ժամանակ, որ հիմա եկել խոստումներ ես տալիս»,- ասաց Արմեն Բադալյանը: