«ԵԱՀԿ Մինսկի խմբի առաքելությունը դեռ չսկսված ավարտվել է. Ադբեջանը վերականգնել է իր տարածքային ամբողջականությունը». Ադրբեջանի խորհրդարանի փոխխոսնակ

Լեռնային Ղարաբաղի հակամարտության կարգավորման ԵԱՀԿ Մինսկի խմբի (ՄԽ) առաքելությունը դեռ չսկսված ավարտվել է:

Այս մասին այսօր հայտարարել է Ադրբեջանի Միլի մեջլիսի (խորհրդարանի) առաջին փոխխոսնակ Ալի Հուսեյնլին, գրում է Trend-ը:

Ըստ նրա` ԼՂ հարցը լուծվել է «Ադրբեջանի հակահարձակողական գործողությունների հետևանքով»:

«Ինչ վերաբերում է նրան, թե Մինսկի խումբը կարող է որևէ այլ գործողություն ձեռնարկել, ապա միակ բանը, որ այն կարող է անել, Հայաստանին ստիպելն է կատարել 2020 թվականի նոյեմբերի 10-ի եռակողմ հայտարարության դրույթները: ԵԱՀԿ ՄԽ-ն կարող է օգտակար լինել այս հարցում»,- ասել է նա և հավելել՝ այլևս որևէ հակամարտություն չկա, քանի որ Ադրեջանն ապահովել է իր տարածքային ամբողջականությունը:

Ինչպես ավելի վաղ տեղեկացրել էր Tert.am-ը, Հայաստանի Հանրապետությունը կատարել է հայտարարության կետերով սահմանված պարտավորությունները, որը չի կարելի ասել Ադրբեջանի մասին: Պաշտոնական Բաքուն մինչ օրս հրաժարվում է կատարել ռազմագերիների վերադարձնելու մասին կետը: Ավելին, երկրում հայ ռազմագերիների նկատմամբ քրեական գործեր են հարուցվում, որը համարվում է միջազգային իրավունքի կոպիտ խախտում:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն էին ձեռք բերել, ստորագրվել էր հայտարարություն, որով Ադրբեջանին են անցել Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։