Փաշինյանը փորձում է ռեաբիլիտացվել Ռուսաստանի աչքերում. փորձագետ
Նիկոլ Փաշինյանն իր իշխանությունը երկարաձգելու նպատակով փորձում է ռեաբիլիտացվել Ռուսաստանի աչքերում: Այս մասին Tert.am-ի հետ զրույցում նշել է «Հայացք» վերլուծական կենտրոնի փորձագետ Հասմիկ Վարդանյանը:
«Չնայած հայ-ռուսական փայլուն հարաբերությունների մասին Փաշինյանի պնդումներին՝ բոլորի համար տեսանելի է, որ վերջինիս հետևողական քաղաքականության արդյունքում մենք այսօր Ռուսաստանի հետ հարաբերություններում ունենք լուրջ խնդիրներ, և երկկողմ օրակարգը, մեղմ ասած, չի համապատասխանում հարաբերությունների ռազմավարական, դաշնակցային բնույթին», - նշել է փորձագետը:
«Փաշինյանը վերջին շրջանում սկսել է խոսել հայ-ռուսական համատեղ զորախմբի և Հայաստանի անվտանգության ապահովման հարցում դրա դերակատարման մասին: Պետք է նկատենք, որ այդ զորախումբը նոր չի ստեղծվել և ընդհանրապես, անվտանգության ոլորտում հայ-ռուսական համագործակցության իրավապայմանագրային բազան, գործիքակազմը, որն այսօր փորձում է խաղարկել Փաշինյանը, որևէ կերպ նորություն չեն և եղել են իր կողմից իշխանությունը ստանձնելու պահին: Սակայն Փաշինյանը այս ողջ ընթացքում հասկացել է դրանց իմաստը, նշանակությունը և գործարկման հետ կապված հարցերը», - նշել է Վարդանյանը:
Փորձագետը Փաշինյանի կողմից հայ-ռուսական ռազմական և անվտանգային ոլորտներում համագործակցության հանկարծակի կարևորումը պայմանավորում է նախընտրական գործընթացներով:
«Մի կողմից Փաշինյանը չի կարող հաշվի չնստել տարածաշրջանում Ռուսաստանի ազդեցության մեծացման հետ, մյուս կողմից Հայաստանում և Արցախում հասարակությունը, հստակ գիտակցելով մեր անվտանգության ապահովման հարցում Ռուսաստանի ունեցած դերակատարումը, այսօր առանձնակի է կարևորում հայ-ռուսական հարաբերությունները, և ընտրությունների ժամանակ դրա վրա բավականին մեծ ուշադրություն է դարձվելու», - նշել է նա:
«Սակայն այստեղ շատ կարևոր է հասկանալ, թե որոնք են երաշխիքները, որ Փաշինյանն առաջիկայում ևս իր գործողություններով և հայտարարություններով հարված չի հասցնի հայ-ռուսական հարաբերություններին: Ազգային ժողովում իր ելույթի ժամանակ Ռուսաստանին ուղղված ռեվերանսներին զուգահեռ, Փաշինյանը հերթական անգամ իրեն արդարացնելու նպատակով անուղղակիորեն հերքեց Ռուսաստանի նախագահի խոսքերը՝ այդպիսով հերթական անգամ հակառուսականության ազդակ հղելով մեր հասարակությանը», - նշել է նա: