Արքայազն Ֆիլիպի հուղարկավորությանը թագավորական ընտանիքի տղամարդիկ զինվորական համազգեստ չեն կրի արքայազն Հարիին հասարակական նվաստացումից զերծ պահելու համար. Daily Mail

Մեծ Բրիտանիայի թագուհի Էլիզաբեթ 2-րդը որոշում է ընդունել, որ Էդինբուրգի դուքս արքայազն Ֆիլիպի հուղարկավորության արարողության ժամանակ թագավորական ընտանիքի տղամարդիկ զինվորական համազգեստ չեն կրելու, հայտնում է բրիտանական Daily Mail պարբերականը։

Պարբերականը պարզել է, որ նման որոշում վերջին պահին կայացվել է թագուհու կողմից՝ արարողության ժամանակ ընտանեկան միասնական ճակատ ներկայացնելու նպատակով։

Հիշեցնենք, որ արքայազն Հարիին չէր թույլատրվել կրել իր զինվորական համազգեստը, քանի որ վերջինս սեփական կամքով վայր է դրել թագավորական ընտանիքի ավագ անդամի լիազորությունները, ինչը սկանդալի առիթ էր դարձել։

Բրիտանական պարբերականը նշել է, որ արքայազն Հարիի` հուղարկավորման արարողությանը ռազմական համազգեստով (նա այդ համազգեստով է պսակադրվել) ներկայանալու ցանկությունը միանգամայն հասկանալի է, սակայն նրան թույլատրվել է միայն կոստյում կրել՝ իր ծառայության համար և թագուհու կողմից ստացած շքանշաններով։

Աղբյուրներից մեկի համաձայն` թագուհին որոշում է կայացրել, որ ընտանեկան միասնությունը պահպանելու և Հարիին ցանկացած հասարակական նվաստացումից հետ պահելու համար բոլորը նույն կերպ են հագնվելու` տղամարդիկ վերարկուներ և սև փողկապներ, իսկ կանայք` հասարակ սև զգեստներ:

Սա վերջին 100 տարվա ընթացքում 2-րդ դեպքն է, երբ միապետի կամ նրա կողակցի հուղարկավորությանը թագավորական ընտանիքի անդամները զինվորական համազգեստ չեն կրում։

Սա, ըստ պարբերականի, կդիտվի որպես խաղաղության խորհրդանիշ՝ անցյալ ամիս արքայազն Հարիի և նրա կնոջ աղմկահարույց հարցազրույցից հետո, երբ ամուսինները սկանդալային բացահայտումներ էին արել թագավորական ընտանիքի վերաբերյալ:

Հիշեցնենք, որ հուղարկավորության արարողությունը տեղի է ունենալու Վինձորի ամրոցի Սուրբ Ջորջի մատուռում` ապրիլի 17-ին, ժամը 15: 00-ին և հեռարձակվելու է հեռուստատեսությամբ:

Հայտնի է, որ, հակառակ արքայական (պետական) հուղարկավորության հնարավորությանը, արքայազնը նախընտրել է, որ ռազմական հուղարկավորություն տեղի ունենա և արարողությունն անցկացվի Ուինձորի ամրոցի Սուրբ Ջորջի մատուռում։

Ինչպես ավելի վաղ տեղեկացրել էր Tert.am-ը, արքայազնի մահվան մասին թագավորական ընտանիքը հայտնել է իր թվիթերյան էջում․ «Խոր ցավով Նորին Մեծություն թագուհին տեղեկացրել է իր սիրելի ամուսնու՝ Էդինբուրգի դուքսի մահվան մասին: Նորին թագավորական մեծությունը կյանքից խաղաղ հեռացել է այսօր առավոտյան` Վինձորի ամրոցում»։

Արքայազնը մահացել է 99 տարեկանում։

Արքայազն Ֆիլիպը Մեծ Բրիտանիայի պատմության մեջ միապետի ամենաերկարակյաց կողակիցն է:

Զույգն ամուսնացել է 1947 թվականին, երբ թագուհին ընդամենը 21 տարեկան էր, իսկ արքայազնը թագավորական նավատորմի սպա էր:

Հիշեցնենք նաև, որ փետրվարին արքայազնը տեղափոխվել էր Լոնդոնի կենտրոնում գտնվող «Էդուարդ VII» մասնավոր հիվանդանոց ապա սրտի վիրահատություն էր տարել Սուրբ Բարդուղիմեոսի հիվանդանոցում։

Ստորև պարբերականը լուսանկարներ է հրապարակել արքայական ընտանիքի անդամների` նախկինում տեղի ունեցած հուղարկավորության արարողություններից և արքայազն Ֆիլիպ կյանքից։