Մայիսից Հունաստանը բաց կլինի 30 երկրից ժամանող պատվաստված կամ կորոնավիորսի թեստի բացասական արդյունք ունեցող զբոսաշրջիկների համար

Հունաստանը զբոսաշրջության վերականգնման ուղղությամբ առաջին քայլը կանի՝ թույլատրելով մուտքը 30 երկրից ժամանող պատվաստված կամ թեստի բացասական պատասխան ունեցող մարդկանց համար, հայտնում է The Guardian-ը։

Հաջորդ շաբաթվանից Եվրամիության ողջ տարածքից, Մեծ Բրիտանիայից, Սերբիայից, Իսրայելից և Արաբական Միացյալ Էմիրություններից Հունաստան ժամանող ճանապարհորդներից այլևս չի պահանջվի ինքնամեկուսանալ։ Ակնկալվում է, որ նոր ռեժիմն ուժի մեջ կմտնի ապրիլի 19-ից, իսկ երկիրը մայիսի կեսերից պաշտոնապես կվերաբացի զբոսաշրջության ոլորտը: Սահմանափակումների վերացման հետ միաժամանակ կվերաբացվեն երկրի 9-ը օդանավակայանները։

Երկրի ՀՆԱ-ի ավելի քան 20 տոկոսն ապահովում է զբոսաշրջության ոլորտը, որի հետ կապված է ամեն 5-րդ աշխատատեղը։ Հունաստանը փորձում է աստիճանաբար վերականգնել տուժած տնտեսությունը, որը համավարակային իրավիճակի պատճառով աննախադեպ տուժել է։

Ինչպես ավելի վաղ տեղեկացրել էր Tert.am-ը, «կանաչ անձնագրեր» տրամադրվում են այն քաղաքացիներին, որոնք պատվաստվել են կորոնավիրուսի դեմ, ինչի շնորհիվ նրանք ձեռք են բերել հակակորոնավիրուսային իմունիտետ ու վտանգ չեն ներկայացնում շրջապատի համար: Աշխարհի մի շարք երկրներ ներկայում քննարկում են անձնագրերի ներդրմանը հարցը:

Հիշեցնենք, որ այս նախագիծն առաջարկել էր Հունաստանի վարչապետ Կիրիակոս Միցոտակիսը և ասել էր, որ համավարակի ավարտվելուն և տնտեսության վերականգնմանը զուգահեռ՝ մարդիկ կսկսեն ավելի շատ ճանապարհորդել:

Հիշեցնենք նաև, որ ԵՄ-ն հայտարարել էր, որ կստեղծի «կանաչ անձնագրեր», որոնք կապահովեն անվտանգ ճանապարհորդություն ԵՄ սահմաններում: Փաստաթուղթը ծառայելու է որպես ապացույց այն բանի, որ անձը պատվաստվել է կորոնավիրուսի դեմ, ստացել է կորոնավիրուսի թեստի բացասական պատասխան կամ արդեն ապաքինվել է:

Անձնագրերը հասանալի կդառնան հունիսի սկզբից:

The Guardian-ը նշել է, որ կորոնավիրուսի տարածումից ի վեր Հունաստանում գրանցվել է վարակման ավելի քան 300 հազար դեպք, որից 9 հազարը` մահվան ելքով։