Նման հայտարարություն զինվորականն իրավունք չուներ անել․ Անդրանիկ Քոչարյանը՝Ռուստամ Մուրադովի հայտարարության մասին
Նման հայտարարություն զինվորականն իրավունք չուներ անել։ Այս մասին ապրիլի 14-ին, Ազգային ժողովում լրագրողների հետ զրույցում հայտարարեց ԱԺ Պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով Արցախի խաղաղապահ զորքերի հրամանատար Ռուստամ Մուրադովի այն հայտարարությանը, որ գերիների վերադարձի մասին լուրերը «կեղծ պրովոկացիա էիր»։
Անդրանիկ Քոչարյանը փորձեց խմբագրել օրեր առաջ արած իր հայատարարությունը, թե Մուրադովը գնացել էր Բաքու գերիներին ուղեկցելու Երևան և որ այդ առնչությամբ եղել է պայմանավորվածություն, որը խախտվել է։ Եթե ԱԺ փոխխոսնակ Ալեն Սիմոնյանը գերիների վերադարձի մասին տեղեկությունը բացատրել էր նման «հույս ունենալով», Անդրանիկ Քոչարյանը պարզվում է նման տպավորություն է ունեցել։
«Մուրադովի գնալը համընկավ վարչապետի Մոսկվա այցի հետ և հետմոսկովյան այցի արդյունքում այնպիսի տպավորություն էր, որ գերիների հարցն ինչ-որ ձև ստանում է լուծում։ Բայց պարզվեց, որ իրողությունն այլ է»,- նշեց նա։
Լրագրողի հարցին, թե ում պետք է հավատա հայ հանրությունը՝ Ռուստամ Մուրադովին, որը հայտարարում է, որ գերիներին բերելու պայմանավորվածություն չի եղել, թե Մանե Գևորգյանին, որը լրատավամիջոցների հետ զրույցում հաստատաում է, որ կա նման պայմանավորուծություն, Անդրանիկ Քոչարյանը պատասխանեց․ «Հայ հանրությունը պետք է հավատա իր իշխանություններին»։
NEWS.am-ի լրագրողի ճշտող հարցին, թե արդյոք Մուրադովը սուտ է ասել, թե ոչ, չպատասխանեց՝ փոխարենը իր սովորության համաձայն վրդովվեց և հերթական անգամ «սպառնաց» հոսանքազրկել լրագրողին։
Հիշեցնենք, որ լրագրողի հարցին, թե ինչու գերիներ չվերադարձան, ինչպես սպասվում էր, Արցախի խաղաղապահ զորքերի հրամանատար Ռուստամ Մուրադովը պատասխանել էր․ «Կեղծ պրովոկացիա էր: Նրանք թյուրիմացության մեջ են գցում բնակչությանը»։ Իսկ Անդրանիկ Քոչարյանը լրագրողների հետ զրույցում նշել էր․ «Մուրադովը եղել է ինքնաթիռի մեջ, իսկ դա նշանակում է որ եղել են պայմանավորվածություններ, որոնք խախտվել են»։