Անվտանգության խորհուրդը հո «պռախադնոյ դվոռ» չի, ամեն ասված բառ արձանագրվում է, չի եղել այդպիսի զեկույց, որի մասին ասում են․ Նիկոլ Փաշինյան

«Լելե Թեփե» բարձունքի վերաբերյալ խոսակցությունը ներմուծվել է որպես քարոզչական հնարք՝ ցույց տալու համար, թե այնտեղ օպերացիա է եղել ինչ-որ մի հատ սար՝ իշխող ուժի կամ վարչապետի քարոզչական նպատակներն իրագործելու համար։ Քննարկումների ընթացքում «Լելե Թեփե» անուն չի քննարկվել, դրա մասին խոսակցություն չի եղել, դա հետո ներմուծվել է որպես քարոզչական հնարք՝ հայտնի շրջանակների կողմից։

Այս մասին ԱԺ-ում, Կառավարության ծրագրի կատարման ընթացքի և արդյունքների մասին 2020թ․ տարեկան զեկույցի ներկայացմանը հայտարարեց Նիկոլ Փաշինյանը՝ անդրադառնալով իմքայլական պատգամավոր Հովիկ Աղազարյանի դիտարկմանը, թե բաց է մնում հարցը՝ «Լելե Թեփե»-ի օպերացիայի բուն նպատակը ո՞րն է։

Փաշինյանի խոսքով՝ խնդիր է եղել ճեղք փակելու, քննարկում է եղել, իսկ ԳՇ պետը ասել է՝ հետաքրքիր գաղափար է, բայց պետք է տեղում գնահատել իրադրությունը։ «Օպերացիան սկսել է, մի քանի ժամ, ինչպես ինձ զեկուցել են, հաջող իրագործվել է, չի իրագործվել այն պատճառով, որ տանկային միավորումներից մեկն իր անելիքի մասը չի արել և նախատեսված ձևով չի մասնակցել օպերացիային»,-ասաց նա ՝ նշելով, թե դա պետք է լինի քննության առարկա։

«Միավորումը, որի հրամանատարը եղել է այսօր ակտիվ ընդդիմադիր գործունեություն ծավալող գեներալներից մեկի որդին, չի կատարել իր պարտականությունները, ես չգիտեմ՝ կարո՞ղ է «17»-ը հենց իրեն է զանգել, ասել՝ ի՞նչ ես անում, այդտեղ չէ քո թշնամին, Երևանում է, այդ օպերացիան «թարգեք», եկեք Կառավարության շենքը գրոհեք, ինչո՞ւ եք 9-րդ պաշտպանական շրջանի ճեղքը գրոհում։ Կարո՞ղ ա նորահայտ ընդդմադիր գործչին զանգել է իր քաղաքական հայրը, ինքն էլ՝ իր որդուն, ասել է՝ տանկերը պտտեք դեպի Երևան»,-ասաց նա, ապա շարունակեց ելույթը՝ անդրադառնալով իրեն վերաբերող հայտարարություններին․

«Ինչ ասես՝ ասացի՝ մեղավոր եմ, պատասխանատու եմ, իմն է պարտությունը, հասկացանք․ ձե՞ռ եք առնում ձեզ ընդհանարապես, այ ռազմի դաշտից փախչողներ։ Անվտանգության խորհուրդը հո «պռախադնոյ դվոր» չի, ամեն ասված բառ արձանագրվում է, չի եղել այդպիսի զեկույց, որի մասին ասում են»,-հայտարարեց նա։