Մենք պետք է հասկանանք, որ բոլորս մի նավում ենք, եթե այն խորտակվի, կխորտակվենք բոլորս, իսկ Փաշինյանը կարողանում է թիավարել այդ նավը․ իմքայլական պատգամավոր Տաթևիկ Հայրապետյան (տեսանյութ)
Ադրբեջանում տասնամյակներ շարունակ պետական մակարդակով քարոզվել է հայի դեմ ատելություն, իսկ Հայաստանում երբեք, որևէ իշխանության օրոք պետական մակարդակով որևէ ազգության, ժողովրդի և պետության դեմ չի քարոզվել ատելություն, ես սա կարևոր ձեռքբերում եմ համարում: Այս մասին ԱԺ-ում լրագրողների հետ ճեպազրույցի ժամանակ ասաց իմքայլական պատգամավոր Տաթևիկ Հայրապետյանը՝ պատասխանելով լրագրողի այն դիտարկմանը, որ երեկ Բաքվում բացվել էր պուրակ, որտեղ Ալիևը ներկայացնում էր հայ զինվորների սաղավարտներով թանգարան, որտեղ գրավված ավարն էր ցուցադրվում և այս ֆոնին Հայաստանում իշխանությունը հայտարարում է, որ պետք է գնալ բարիդրացիական հարաբերությունների հաստատմանը:
Նրա խոսքով՝ Ադրբեջանը քսենոֆոբիկ ռասիստական պետություն է: «Ինչ վերաբերում է Հայաստանում հնչող հայտարարություններին, ապա նախկին իշխանության օրոք նաև խոսել են Թուրքիայի հետ հնարավոր հարաբերությունների կարգավորման մասին՝ շեշտելով դրանց՝ առանց նախապայմանների բնույթը: Դրա մասին խոսվել է նաև մեր նախընտրական ծրագրում, դրանից զատ որևէ բարեկամության մասին որևէ խոսք չի գնացել: Այսինքն, որ մեր երկրում երբեք թշնամանք չի քարոզվել, դրա ականատեսը եղել ենք տասնամյակներ շարունակ, ես երբեք չեմ ուզենա, որ մեր երկրում թշնամանք քարոզվի»,- ասաց պատգամավորը:
Ինչ վերաբերում է Ադրբեջանի նախագահի ձեռնարկած քայլերին, պատգամավորի խոսքով, նա մեկ անգամ ևս ցույց տվեց ամբողջ աշխարհին, որ ինքը պատրաստվում է պետական մակարդակով շարունակել ատելություն քարոզել:
Դիտարկմանը, թե Ալիևը խոսում է նաև Հայաստանի հետ խաղաղության պայմանագրի կնքման մասին և Հայաստանի քաղհասարակությանը կոչ է անում այդ հարցում աջակցել իրեն և հարցին՝ այս ամենի համատեքստում պատգամավորն ինչպես է պատկերացնում Ադրբեջանի հետ խաղաղության համաձայնագրի կնքումը, Հայրապետյանը պատասխանեց.
«Պետք է խոստովանեմ, որ Ալիևը շատ լավ օգտագործում է մեր ներքաղաքական իրավիճակը՝ իր տարբեր ելույթներում տարբեր շեշտադրումներով ինչ-որ շահարկումների առիթ տալով: Բազմիցս նշել եմ, որ մենք չպետք է տրվենք այդ պրովոկացիաներին, մեր բոլոր անհամաձայնություններին, տարակարծություններին, փոխադարձ մեղադրանքներին: Հարցեր կան, որոնց շուրջ մեր դիրքորոշումը պետք է անսասան լինի, դրանում է մեր ուժը»,-ասաց պատգամավորը:
Ինչ վերաբերում է Ալիևի հայտարարություններին, պատգամավորն ասաց, որ Հայաստանը մինչև պատերազմը միշտ էլ ասել է, որ պատրաստ է հակամարտությունը լուծել խաղաղ ճանապարհով, հսկայական ջանքեր է գործադրել այդ ուղղությամբ, իսկ Ալիևը երեկ ևս մեկ անգամ խոստովանեց, որ ինքը բացարձակ չէր պատրաստվում խաղաղության: «Թե ինչու մենք ավելի ինտենսիվորեն չէինք պատրաստվում հնարավոր ռիսկերի, պատերազմական գործողությունների կանխարգելմանը, արդեն դժվարանում եմ ասել, շատ ավելի երկար մտորելու թեմա է և շատ ավելի երկար տարիների մասին է խոսակցությունը»,- ասաց պատգամավորը:
Հայրապետյանը նաև նշեց՝՝ բոլորս մի նավում ենք, իսկ այդ նավը թիավարել կարողանում է Նիկոլ Փաշինյանը. « Մենք պետք է հասկանանք, որ բոլորս մի նավում ենք, եթե այն խորտակվի, կխորտակվենք բոլորս, իսկ Փաշինյանը կարողանում է թիավարել այդ նավը»:
Մանրամասները՝ տեսանյութում: