Ծնողների զայրույթը հասկանալի է․ նրանց մի քանի անգամ զանգահարել ու ասել են՝ ձեր երեխայի մարմնից հատված ենք գտել, և նրանք 4 անգամ հուղարկավորություն են կազմակերպել. Սոֆյա Հովսեփյան

Ծնողները հոկտեմբերի 11-ից սկսած` այսինքն` շուրջ 7 ամիս խնդիր են բարձրաձայնում, թե ինչու են հանձնված տարածք վաշտ ուղարկել և ամբողջապես ոչնչացրել այն և, իհարկե, դա ծնողների մոտ հարցեր է առաջացնում, որոնց պատասխանները չկան: Այս մասին լրագրողների հետ զրույցում ասաց ԱԺ պատգամավոր Սոֆյա Հովսեփյանը՝ անդրադառնալով անհետ կորածների ծնողներին, որոնք այսօր գնացել էին ԱԺ:

«Մի պահ խոսվեց՝ գործ է հարուցվել և այլն, բայց ընդամենը մամուլում տարածվեց դա և որևէ շարժընթաց չի եղել, և այստեղ անհրաժեշտություն կա, որ կոնկրետ անձինք, ընդ որում՝ բոլորը ողջ են և մենք չենք խոսում մահացածների մասին, այլ սպայական կազմի, որոնք տարել են երեխաներին և հրահանգներ տվել, իրենք պետք է հարցաքննվեն և պատասխանատվության ենթարկվեն, ծնողների ամբողջ պահանջը մեղավորներին պատասխանատվության ենթարկելն է»,- ասաց Սոֆյա Հովսեփյանը:

Նա նաև նշեց՝ իրավիճակին որակումներ չի կարող տալ, բայց ինչ հանգամանք էլ պարզվի հարցաքննության ավարտին, միևնույն է՝ սպայական անձնակազմը պետք է պատասխանատվության ենթարկվի:

«Գործը պետք է քննվի իրավական հարթության վրա և հասկանան՝ սա միտո՞ւմ է, թե սա անփութություն է։ Եթե միտում է, ապա դավաճանական քայլ է, եթե անփութություն՝ հերթականն է, քանի որ չի կարող ուղղակի զինվորական հրաման իջնել առանց հաշվարկներ կատարելու»,- ասաց նա:

Պատգամավորը նաև նշեց, թե այն, ինչ վերապրում են զոհվածների և անհայտ կորածների ծնողները, անբացատրելի է և նրանց պահվածքը լիովին արդարացված է:

«Մինչ օրս որևէ դավաճան չի պատժվել, մինչ օրս որևէ դավաճան չի դատապարտվել և ծնողների ցասումն ու զայրույթը դրանից է գալիս, պատկերացրեք՝ մի ամսում մի քանի անգամ ծնողին զանգահարում են ու ասում, որ գտել են իր երեխայի մարմնի հերթական մասը, և ծնողը 4 անգամ հուղարկավորություն է կազմակերպում, պետք է գիտակցեն, որ մի օր կանգնելու են այս ծնողների ինքնադատաստանի առաջ»,- նշեց պատգամավորը:

Սոֆյա Հովսեփյանը նաև անդրադարձավ Պաշտպանության նախարարությանը և ընդգծեց՝ պատերազմական և հետպատերազմական ժամանակաշրջանում այդ կառույցը պարապուրդի է մատնված եղել, այդ ամենի արդյունքները տեսնում ենք ամեն օր:

«ՊՆ-ի համապատասխան անձինք որևէ մեկը իր տեղում չի եղել, որի արդյունքը այսօրվա իրադրությունն է, ծնողների հերթական խմբի հետ ենք հանդիպում, բոլորը խոսում են նույն բանի մասին և փաստացի ունենք երեխաների մասունքներ, որոնք կա՛մ գտնվել են, կա՛մ չեն գտնվում: ՊՆ-ի կողմից մոտեցում գոյություն չունի, ամեն մեկը պատասխանատվությունը գցում է մյուսի վրա»,- ասաց Սոֆյա Հովսեփյանը: