Վստահ եմ՝ եթե Հայաստանը թևակոխեց նախընտրական փուլ, ապա Ալիևը ինչ-որ քանակի ռազմագերի է վերադարձնելու, որպեսզի Նիկոլի վարկանիշը բարձրացնի. Արմեն Աշոտյան
Ես ուզում եմ հիշեցնել, որ ռազմագերիների խնդիրը, որպես այդպիսին, առաջացել է բացառապես Նիկոլ Փաշինյանի անձնական մեղքի, սխալների, դավաճանության պատճառով: Երբ նոյեմբերի 9-ին փաստաթուղթ էր ստորագրում, նա պարտավոր էր ամրագրել գերիների փոխանակման վերջնաժամկետը, ակնհայտ է, որ այս պարագայում մենք Բաքվից մեծ կախվածության մեջ էինք ընկնելու: Այս մասին այսօր հրավիրված ասուլիսի ժամանակ ասել է ՀՀԿ փոխնախագահ Արմեն Աշոտյանը:
«Ես վստահ եմ՝ եթե Հայաստանը թևակոխեց նախընտրական փուլ, ապա Ալիևը ինչ-որ քանակի ռազմագերի է վերադարձնելու, որպեսզի Նիկոլի վարկանիշը բարձրացնի»,- ասաց Աշոտյանը:
Աշոտյանի խոսքով՝ շատ զինվորականներ կան, որոնք իրականում գիտեն, թե ինչ է տեղի ունեցել պատերազմի ընթացքում, սակայն չեն ցանկանում խոսել, որպեսզի պաշտոն չկորցնեն: «Փաստերը հարյուրավոր են, բայց հետաքննություն անելու համար մեզ պետք են խղճով մարդիկ, որոնք պետք է թքած ունենան իրենց պաշտոնի վրա էլ, փողի վրա էլ: Այդ մարդիկ չկան, ես հիասթափված եմ շատ բարձրաստիճան զինվորականներից, որովհետև անտարբերություն են դրսևորում, իսկ հետո՝ դավադիր հանցակցություն»:
Ըստ նրա՝ ռազմագերիների ճակատագիրն այսօր պահանջում է անհապաղ գործողություններ, քաղաքական պոտենցիալը պետք է օգտագործվի մարդկային ճակատագրեր փրկելու համար, սակայն միևնույն է, իշխանափոխությունից հետո է գալու ճշմարտությունը հրապարակելու պահը:
Անդրադառնալով Նիկոլ Փաշինյանի Ռուսաստան այցին և ՌԴ նախագահ Վլադիմիր Պուտինի հետ հանդիպմանը՝ Աշոտյանը նշեց, որ Հայաստանը երբեք այսքան անինքնասեր ու անինքնիշխան չի եղել և այս իրավիճակում Ռուսաստանը մեր երկրի ֆիզիկական գոյության միակ երաշխավորն է: Ըստ նրա՝ այս պարագայում առանց Մոսկվայի միջնորդության Հայաստանը ոտքի կանգնել չի կարող. «Մեզ պետք է հեռու պահենք աշխարհաքաղաքական և առնվազն Արևմուտք-Ռուսաստան բախումներից, այստեղ պետք է մղենք ամբողջ դիվանագիտական ներուժը, որ Մինսկի խմբի համանախագահների հետ աշխատանքը նորովի, թարմացված վերականգնենք, որ ունենանք լիակատար կոնսենսուս Ռուսաստանի, ԱՄՆ,-ի Ֆրանսիայի հետ»:
Նա շեշտեց՝ կա ճգնաժամ բոլոր կողմերով, ընտրությունները դրան լուծում չեն լինելու: Նար դիտարկմամբ՝ Փաշինյանի դեմ պայքարը պետք է շարունակվի մինչև վերջ. «Ավելի լավ է մի քիչ էլ համբերել ու Փաշինյանին վերջնականապես հեռացնել, քան գնալ մի գործընթացի, որտեղ վերջինս կարող է վերընտրվել»: