«Թուրքիան և իր աջակցությունը վայելող զինյալ խմբավորումները շարունակում են «ավերել» Աֆրինը»․ The Jerusalem Post
Թուրքիայի աջակցությունը վայելով զինյալները Սիրիայի հյուսիս-արևմուտքում «ավերում են» մեծամասամբ քրդերով բնակեցված Աֆրին շրջանը, հայտնում է The Jerusalem Post-ը։
Թուրքիան քրդական «Ժողովրդի պաշտպանության ստորաբաժանումներ»-ի դեմ սահմանային ռազմական գործողություններ է սկսել դեռևս 2018 թվականին։ Այդ ժամանակվանից ի վեր տարածաշրջանը հիմնականում վերահսկվում է Թուրքիայի աջակցությունը վայելող սիրիա-արաբակաn սուննի իսլամիստական զինյալ խմբավորումների կողմից, որոնք միջազգային կազմակերպությունների, այդ թվում ՝ ՄԱԿ-ի կողմից մեղադրվում են տեղի բնակչության նկատմամբ հանցագործություններ իրականացնելու հարցում:
Աֆրինցի փախստական Ջիգեր Հուսսեյնը, որն այժմ ղեկավարում է Հյուսիսային Սիրիայում առևանգման դեպքերի հետաքննող խումբը, ասել է․«Մենք ունենք լուրջ ապացույցներ, որոնք վկայում են, որ Թուրքիան և իր կողմից աջակցություն վայելող զինված ծայրահեղական խմբավորումները ներգրավված են Աֆրինում տեղի ունեցող միջազգային հանցագործություններում, այդ թվում` բռնաբարություններ, թրաֆիքինգ և մահացու կտտանքներ»։
«Ձիթենու ճյուղ» ռազմական գործողությունը, որը սկսվել է 2018 թվականի հունվարի 20-ին և ավարտվել նույն տարվա մարտի 18-ին՝ թուրքական զինուժի և դրա աջակցությունը վայելող իսլամական ուժերի կողմից, հանգեցրել է քրդական «Ժողովրդի պաշտպանության ստորաբաժանումներ»-ի պարտությանը՝ շրջանից շուրջ 200 հազար քրդերի վտարմամբ կամ փախուստով։ Գործողության հետևանքով քրդական բնակչության թվաքանակը 350 հազարից հասել է մոտ 150 հազարի:
Աֆրինի քուրդ բնակչությանը վտարելուց հետո Թուրքիան ձեռնամուխ է եղել տարածքը սիրիացի փախստականներով վերաբնակցնելուն և մոտ 100 հազար մարդ է վերաբնակեցվել։
ACAPS միջազգային, անկախ մարդասիրական վերլուծական կենտրոնի տվյալների համաձայն՝ Աֆրինում մնացած քուրդ և եզդի բնակչությունը բռնությունների է ենթարկվում․«Աֆրինի քուրդ բնակչությունը մշտական ապաստանի, սննդի և անվտանգության խնդիր ունի»։
Հարցին անդրադարձել են նաև ԱՄՆ-ի Պետդեպարտամենտն ու ՄԱԿ-ը։
ՄԱԿ-ի Մարդու իրավունքների գերագույն հանձնակատարի գրասենյակը կոչ է արել Թուրքիային հետաքննել իրավիճակը։
Jerusalem Post-ը ընդգծել է, որ վերջին տասնամյակում Սիրիան ականատես է եղել մարդու իրավունքների ոտնահարման ամենասարսափելի օրինակներին․ «Աֆրինի էթնիկ զտումները, քրդական և եզդիական մնացած բնակչության ներկայիս և շարունակական հետապնդումները, ներառյալ կանանց կանխամտածված թիրախավորումը, այս ողբալի պատմության ամենամութ գլուխների շարքում են»։