Եթե համախմբում լինի, հնարավոր է` «Զարթոնք»-ը մասնակցի ընտրություններին. Արա Զոհրաբյան
Պատերազմի պարտությունից հետո արցախյան հարցով բանակցողը պետք է փոխվեր, որովհետև դու չես կարող քեզ ծեծողի հետ հավասար խոսել, միշտ պատրաստ է լինելու զիջումների, չի լինելու պահանջատեր: Այս մասին, այսօր՝ ապրիլի 10-ին, «Զարթոնք» ազգային-քրիստոնեական նախաձեռնության ասուլիս-քննարկման ժամանակ ասաց Փաստաբանների պալատի նախագահ Արա Զոհրաբյանը:
«Նոր բանակցողը կարող էր բարձրացնել Սյունիքի անվտանգության հարցը, Իրան-Հայաստան ճանապարհի անվտանգության հարցը, որը Մեղրին մյուս մարզերին կապող միջհամայնքային ճանապարհն է»,-ասաց Արա Զոհրաբյանը՝ նշելով, որ նոր բանակցողը կխոսեր նրա զիջումներից, և հարց կբարձրացներ, օրինակ, Կուբաթլուն հանձնելու մասին: «Եթե անգամ պետք էր զիջել, դա պետք է արվեր ամենավերջում: Այս իրավիճակի պատճառը իշխանության թույլ լինելու մեջ է»,-ասաց Զոհրաբյանը:
Ինչ վերաբերում է արտահերթ ընտրություններին, ապա Արա Զոհրաբյանն ասաց, որ նախ Նիկոլ Փաշինյանի իրավունքը չէ արտահերթ ընտրությունների օր նշանակելը, դա նախագահի լիազորությունն է: Ինչ վերաբերում է «Զարթոնք»-ի՝ ընտրություններին մասնակցելուն, Արա Զոհրաբյանն ասաց, որ հնարավոր է. «Եթե կարողանանք համախմբում իրականացնել, ապա հնարավոր է, որ մասնակցենք»:
Թե ում հետ են պատկերացնում համախմբումը, Արա Զոհրաբյանն ասաց, որ պատրաստ են համագործակցել նախաձեռնության արժեքները կրող ուժերի հետ, պատրաստ չեն համագործակցել ներկա իշխանության հետ. «Հնարավոր է՝ չհամագործակցենք այն սուբյեկտների հետ, որոնք մասնակցություն են ունեցել ներկա իշխանության ձևավորման հարցում»: