«Ընտիր տղա էր». Բայդենը ցավակցել է արքայազն Ֆիլիպի մահվան կապակցությամբ (տեսանյութ)
ԱՄՆ նախագահ Ջո Բայդենը, անդրադառնալով Մեծ Բրիտանիայի թագուհի Էլիզաբեթ Երկրորդի ամուսնու` Էդինբուրգի դուքս արքայազն Ֆիլիպի մահվանը, նշել է, որ իր ամբողջ աշխատակազմ ցավակցություն է հղել բրիտանացի միապետին:
Ինչպես նշում է BBC-ն, Բայդենն իր խոսքում հանգուցյալին նկարագրել է որպես «ընտիր տղա»:
Բացի այդ, ԱՄՆ նախագահն ընդգծել է արքայազն Ֆիլիպի նվիրումը ռազմական գործին, Երկրորդ աշխարհամարտի տարիներին նրա ակտիվ ծառայությանը, ինչպես նաև շրջակա միջավայրի պահպանման ոլորտում ունեցած նվաճումներին:
Ինչպես ավելի վաղ տեղեկացրել էր Tert.am-ը, արքայազնի մահվան մասին թագավորական ընտանիքը հայտնել է իր թվիթերյան էջում․ «Խոր ցավով Նորին Մեծություն թագուհին տեղեկացրել է իր սիրելի ամուսնու՝ Էդինբուրգի դուքսի մահվան մասին: Նորին թագավորական մեծությունը կյանքից խաղաղ հեռացել է այսօր առավոտյան` Ուինձորի ամրոցում»։
Արքայազնը մահացել է 99 տարեկանում։ Նա Մեծ Բրիտանիայի պատմության մեջ միապետի ամենաերկարակյաց կողակիցն է:
Զույգն ամուսնացել է 1947 թվականին, երբ թագուհին ընդհամենը 21 տարեկան էր, իսկ արքայազնը թագավորական նավատորմի սպա էր, որը սերում էր հունական և դանիական թագավորական ընտանիքներից։ Այսպիսով, Ֆիլիպ Մաունթբաթենը դարձել է Էդինբուրդի դուքս արքայազն Ֆիլիպ։
Հիշեցնենք, որ փետրվարին արքայազնը տեղափոխվել էր Լոնդոնի կենտրոնում գտնվող «Էդուարդ VII» մասնավոր հիվանդանոց, ապա սրտի վիրահատություն էր տարել Սուրբ Բարդուղիմեոսի հիվանդանոցում։