Ծանր տեխնիկա, տանկեր, դաշտային հիվանդանոց. հրապարակվել են Ուկրաինայի սահմանի մերձակայքում ռուսական ռազմական ճամբարի լուսանկարները. BBC

Ռուսաստանի Դաշնության Վորոնեժի շրջանում՝ Ուկրաինայի հետ սահմանից 170 կմ հեռավորության վրա, հայտնաբերվել է նոր ռազմական դաշտային ճամբար՝ համալրված ծանր սարքավորումներով ու տանկերով: Ճամբարը հայտնաբերել են Հակամարտությունների հետախուզական խմբի (Conflict Intelligence Team) ռուս հետաքննիչները, հայտնում է BBC-ի ուկրաինական ծառայությունը:

«Տեղի բնակիչներից ստացված տեսագրությունների միջոցով մենք Վորոնեժի մոտակայքում գտել ենք մեկ դաշտային ճամբար: Մարդիկ քայլելիս են եղել անտառում և դուրս եկել դաշտ, որտեղ տեղակայված է եղել մեծ թվով ծանր տեխնիկա, այդ թվում՝ տանկեր»,- ասել է խմբի ղեկավար Ռուսլան Լևիևը:

CIT-ի տվյալներով՝ ռազմական ճամբարը կազմավորման փուլում է, բայց այն ամբողջովին հագեցած է տեխնիկայով: Լուսանկարներից երևում է նաև, որ տեղանքում ստեղծվել է վրանային ճամբար, խոհանոց և դաշտային հիվանդանոց:

«Այսինքն՝ միանգամայն հնարավոր է, որ տեխնիկան մարշ-նետում կատարի մեկ օրվա ընթացքում», - ասել է Լևիևը: