Իրանի միջուկային համաձայնագրի վերականգնման շուրջ Վիեննայում կայացած բանակցությունները որակվել են «կառուցողական» և «հաջող»․ ձևավորվել են մասնագիտական աշխատանքային խմբեր

Երեքշաբթի Վիեննայում կայացած բանակցությունների առաջին փուլի արդյունքում համաձայնություն է ձեռք բերվել փորձագիտական մակարդակի բանակցությունները շարունակելու վերաբերյալ, հայտնում է Tehran Times-ը՝ հղում տալով Իրանի միջուկային համաձայնագրի համատեղ հանձնաժողովի նիստի ավարտից հետո Իրանի ԱԳՆ-ի կողմից արված հայտարարությանը։

Երեքշաբթի առանձին հանդիպումներ է անցկացրել փորձագիտական մակարդակի երկու խումբ` քննարկելու պատժամիջոցների վերացման և հակադարձ միջուկային միջոցառումներին վերաբերվող «տեխնիկական» խնդիրները: Հայտարարության մեջ նշված է, որ փորձագիտական մակարդակի հանդիպումների արդյունքները պետք է զեկուցվեն հանձնաժողովին։ Հայտարարության մեջ մեջբերվել է նաև Իրանի միջուկային ծրագրի շուրջ ավագ բանակցող Աբբաս Արաքչիի խոսքերը․ «ԱՄՆ-ի պատժամիջոցների չեղարկումը Իրանի միջուկային համաձայնագրի վերականգնամ առաջին և ամենաէական քայլն է»։

Եվրամիության ընդհանուր արտաքին և անվտանգության քաղաքականության բարձր ներկայացուցիչ Խավիեր Սոլանայի աշխատակազմի ղեկավար Էնրիկե Մորան, որը ղեկավարել է երեքշաբթի օրն անցկացված հանդիպումը, բանակցությունները «կառուցողական» է որակել։

«Որպես համակարգող այստեղ՝ Վիեննայում, կակտիվացնեմ առանձին կապերը բոլոր համապատասխան կողմերի՝ այդ թվում Միացյալ Նահանգների հետ», - նշել է Մորան:

Միջազգային կազմակերպությունների Վիեննայում գործող գրասենյակներում Ռուսաստանի Դաշնության դեսպան Միխայել Ուլյանովը, նույնպես, բանակցությունները որակել է «հաջող»։

«Իրանի միջուկային համաձայնագրի համատեղ հանձնաժողովի նիստը հաջող է անցել։Փորձագիտական մակարդակի երկու խմբերին հանձնարարվել է հստակեցնել Վաշինգտոնի և Թեհրանի կողմից իրականացվելիք միջոցառումները, որոնք ուղղված կլինեն համաձայնագրի ամբողջական իրականացումը վերականգնելուն», - իր թվիթերյալ հաշվում գրել է Ուլյանովը և հավելել, որ խմբերն անմիջապես աշխատանքի են անցել։

Վիեննայում տեղի ունեցած հանդիպման ընթացքում Իրանի և ԱՄՆ-ի ներկայացուցիչները դեմ առ դեմ հանդիպում չեն ունեցել։

Վիեննայում ԱՄՆ պատվիրակության ղեկավար Ռոբերտ Մալին երկուշաբթի Morning Edition լրատվականին ասել է․ «Այս հանդիպումը նպատակ ունի հստակեցնել ԱՄՆ-ի ձեռնարկած քայլերը և Իրանի կողմից ձեռնարկվելիք քայլերը, քանի որ նրանք ավելի շատ են հեռացել Իրանի միջուկային համաձայնագրով սահմանված իրենց պարտավորությունների կատարումից»։

Հիշեցնենք, որ Վիեննայում կայացած բանակցություններից հետո, ինչպես և դրանց նախորդած օրերին իրանցի պաշտոնյաները հայտարարել են, որ Իրանը կվերադառնա միջուկային գործարքով սահմանված իր պարտավորությունների իրագործմանը, եթե ԱՄՆ-ն առաջինն այդ քայլին գնա և չեղարկի Թեհրանի դեմ պատժամիջոցները:

Ինչպես ավելի վաղ հայտնել է Tert.am-ը, գործողությունների համատեղ համապարփակ ծրագիրը (Իրանի միջուկային համաձայնագիր) քաղաքական համաձայնագիր է, որը ստորագրվել է 2015 թվականի հուլիսի 15-ին Իրանի և ԱՄՆ-ի, ՌԴ-ի, Չինաստանի, Մեծ Բրիտանիայի, Ֆրանսիայի, Գերմանիայի միջև՝ Թեհրանի միջուկային ծրագրի վերաբերյալ:

2018 թվականի մայիսի 8-ին ԱՄՆ նախկին նախագահ Դոնալդ Թրամփը հայտարարել էր Իրանի միջուկային ծրագրի վերաբերյալ համաձայնագրից երկրի դուրս գալու մասին: Նա ասել էր, որ ԱՄՆ-ն ապացույցներ ունի, որ Իրանը շարունակում է միջուկային զենքի մշակումը՝ դրանով իսկ խախտելով համաձայնագիրը: Նա նաև հայտարարել Էր Թեհրանի դեմ պատժամիջոցների վերականգնման մասին, որոնք հանվել էին համաձայնագրի կնքումից ի վեր:

Թրամփի կայացրած այս որոշումից հետո Թեհրանն աստիճանաբար սկսել է կրճատել գործարքով սահմանված իր պարտավորությունները: