Այս պահին բոլոր պատվաստանյութերին տրվում է օգտագործման թույլտվություն, ունենք «Спутник V»-ն օգտագործելու իրավական հիմքեր. Անահիտ Ավանեսյան (տեսանյութ)
Այս պահին բոլոր պատվաստանյութերին տրվում է օգտագործման թույլտվություն, այսինքն` մենք ունենք իրավական հիմքեր «Спутник V»-ն օգտագործելու. լրագրողների հետ հանդիպման ժամանակ ասաց առողջապահության նախարար Անահիտ Ավանեսյանը՝ պատասխանելով հարցին, թե Առողջապահական և աշխատանքի տեսչության դեղերի վարչության նախկին պետը պաշտոնապես հայտարարել է, որ «Спутник V»-ն Հայաստանում գրանցված չէ և դե ֆակտո մեր երկրի ղեկավարը խաբում է Ռուսաստանի Դաշնության ղեկավարին, որբ ասում է, որ դեղը Հայաստանում գրանցված է:
«Օրենքն ունի մի քանի մեխանիզմ, այդ մեխանիզմներից մեկը հանդիսանում է թույլտվությունը, որպեսզի արտակարգ իրավիճակներում պատվաստանյութն օգտագործվի և այդ թույլտվությունը տրված է: Բոլոր պատվաստանյութերը, որոնք կավարտեն կլինիկական հետազոտությունների երրորդ փուլն ինչ-որ մի փուլում ավարտական գրանցման վկայական կստանան»,- մանրամասնեց նա:
Նախարարը նշեց, որ այս գիշեր ստացել ենք «Спутник V»-ի պատվաստանյութը և երկու դոզայի համար վճարվել է 19 դոլար: Նրա խոսքով՝ բոլոր պատվաստանյութերը երկրներին փոքր խմբաքանակով են վաճառվում և շատ բարդ է ձեռք բերել:
Հարցին, թե վարչապետը պատվաստվե՞լ է, Ավանեսյանը չպատասխանեց՝ ասելով, որ դա բժշկական գաղտնիք է:
Դիտարկմանը, թե երբ վարչապետը վարակվել էր կորոնավիրուսով, այդ մասին տեղեկացվեց, Ավանեսյանը նշեց, որ բժշկական գաղտնիք պարունակող տեղեկությունները, պետք է ճշտել տվյալ անձից:
Հարցին, թե պետությունն ի՞նչ է անում, որ բոլորի համար անվճար լինի պատվաստումը, Ավանեսյանն ասաց, որ պետությունն ամեն ինչ անում է, որ այլ խմբերը ներառվեն պատվաստման գործընթացում. «Զարգացած երկրները ևս առաջնահերություններ են դրել և պատվաստում են ևս ռիսկի խմբի քաղաքացիներին ընթացքում խմբերը կավելացվեն:
Ի պատասխան հարցի, թե լուրեր կան, որ հիվանդանոցներից մեկում 75 տարեկան անձի շնչառական սարքը անջատել են, որպեսզի կարողանան փրկել 35 տարեկան քաղաքացու կյանքը, նախարարը պատասխանեց, որ իրեն նման դեպք հայտնի չէ, վստահ է, որ նման բան չկա։
«Միանշանակ պետք է ամեն ինչ անենք, որ անկանխատեսելի ձևով վարակի տարածումը տեղի չունենա և մեր հիվանդանոցային ռեսուրսներով բավարար, պատշաճ բժշկական օգնություն կարողանանք ցուցաբերել: Այս պահին ծավալված է 2500 մահճակալ, որոնք սպասարկում են COVID պացիենտներին: Վերջին մեկ շաբաթը, եթե համեմատենք նախորդ շաբաթվա հետ, գրեթե նույն ցուցանիշներն ունենք, կգնահատենք, որ շարունակական թռիչքային աճ չունենք»,– ասաց նա:
Հարցին, թե ընտրություններն ինչպես պետք է անցկացվեն, որպեսզի վարակի տարածում չլինի, նախարարը պատասխանեց, թե պետք է ընտրություններն իրականցվեն՝ պահպանելով հակահամաճարակային միջոցառումները:
Ի պատասխան հարցի, թե ԴՆԹ հետազոտությունների հետ կապված ծնողները չեն վստահում և պատերազմում զոհվածների ԴՆԹ նմուշներն ուղարկում են արտերկիր, նախարարը պատասխանեց, որ դա այդ մարդկանց իրավունքն է, և իրենք ևս աջակցում են, որպեսզի պրոցեսն արագ կազմակերպվի: «Մինչև այս պահն արտերկրում իրականացված փորձաքննությունների և մեր կողմից իրականացված փորձաքննությունների արդյունքները նույնն են եղել»: