«Քննիչի եւ Դատախազության այսպիսի պահվածքն անհարիր է». Արծվիկ Մինասյանը պահանջում է քրեական գործ հարուցել

Երևանի ընդհանուր իրավասության դատարանում՝ դատավոր Արման Հովհաննիսյանի նախագահությամբ, այսօր՝ ապրիլի 7-ին, ընթանում էր 2020 թվականի դեկտեմբերին 28-ին ԱԺ շենքի մոտ խաղաղ ակցիայի ընթացքում ոստիկանների անհամաչափ գործողությունների փաստի առթիվ քրեական գործ հարուցելու պահանջով ՀՅԴ ԳՄ անդամ Արծվիկ Մինասյանի բողոքի քննությունը:

Դատարանում Մինասյանի փաստաբան Բենիկ Գալստյանը պատմեց, որ 2020 թվականի դեկտեմբերի 28-ին Արծվիկ Մինասյանը Ոստիկանությունում հաղորդում է տվել այն մասին, որ նույն օրը ժամը՝ 10։00-ի սահմաններում Դեմիրճյան փողոցի ԱԺ-ի մուտքի մոտ ոստիկանության աշխատակիցներն առանց որեւէ իրավական հիմքի բերման են ենթարկել խաղաղ բողոքի ակցիայի մասնակիցներին. «Այդ կերպ խոչընդոտելով այդ ակցիայի իրականացմանը։ Ակցիայի ընթացքում ոստիկանության աշխատակիցներից մեկը կոպիտ վերաբերմունք է դրսեւորել նաեւ Մինասյանի նկատմամբ. վիրավորել իրեն, ինչից հետո մի քանի ոստիկաններ առանց որեւէ իրավական հիմնավորման բռնի բերման են ենթարկել։ Շուրջ 16 օր որեւէ տեսակի քննչական գործողություններ չեն կատարվել, հունվարի 13-ին հաղորդումը հայտնվել է ՔԿ-ում, որտեղ սկսվել են նյութեր նախապատրաստել»։

Գալստյանը հայտնեց, որ հունվարի 18-ին Մինասյանը տվել է մանրամասն բացատրություն։

Փաստաբանը շեշտեց, որ հավաքի կազմակերպմամբ իրավական որեւէ նորմ չի խախտվել։

Բենիկ Գալստյանն ասաց, որ բերման ենթարկելու պահին ոստիկան Սահակ Գալստյանը Մինասյանին վիրավորել է, եւ առանց իրավական հիմնավորման բերման ենթարկել։

«Բացատրություն տալու ժամանակ Մինասյանը նաեւ այլ հաղորդում է ներկայացրել՝ Դեմիրճյան փողոցում տեղի ունեցած մեկ այլ միջադեպի առնչությամբ։ ԱԺ մուտքի մոտ տեղի է ունեցել մեկ այլ միջադեպ, երբ ոստիկանների կողմից խաղաղ ցույց ցրելուն մասնակցել են նաեւ կողմնակի անձինք, մասնավորապես, կանաչ գույնի, զինվորական էլիտար համազգեստով ինչ-որ անձնավորություն, որը բացի ֆիզիկական ուժ գործադրելուց նաեւ ցուցումներ է տվել ոստիկաններին, ԱԺ պատգամավոր Սիսակ Գաբրիելյանը, որը պարզապես հարվածներ է հասցրել հավաքի մասնակիցներին եւ հայհոյանքներ է տվել նրանց հասցեներին, Սիսակ Գաբրիելյանի հետ գտնվող կանաչ վերնազգեստով տղամարդ, որը եւս հարվածներ է հասցրել հավաքի մասնակիցներին։ Մինասյանը նաեւ ներկայացրել է տեսանյութը այդ դեպքի մասին»,- ներկայացրեց փաստաբանը։

Գալստյանի խոսքով՝ այդ հաղորդումների առնչությամբ քննությունը պետք է իրականացվեր ՀՔԾ-ում։

Փաստաբանը պնդեց, որ քննիչը նյութեր նախապատրաստելու ընթացքում բացի ոստիկան Սահակ Գալստյանից եւ Արծվիկ Մինասյանից բացատրություն վերցնելուց, այլ գործողություններ չի իրականացրել. «Ինչո՞ւ է միայն մեկ ոստիկանից բացատրություն վերցրել, եթե այդ միջադեպին մասնակցել են մի քանի ոստիկան։ Ինչո՞ւ ոստիկանի բացատրությունը դրել քրեական գործի հարուցումը մերժելու որոշման հիմքում, եթե, ըստ Մկրտչյանի, Մինասյանի հետ տեղի ունեցած միջադեպին նույնիսկ ներկա չի գտնվել»։

Բենիկ Գալստյանն ասաց, որ քննիչը պարզապես փորձել է ամեն գնով նյութերի նախապատրաստմամբ ավարտել Արծվիկ Մինասյանի տված երկու հաղորդումների ընթացքը։

ՀՅԴ ԳՄ անդամ Արծվիկ Մինասյանն էլ նշեց, որ իր կողմից ներկայացրած հանցագործության մասին հաղորդման հիմքում իրավական պետությանը հարիր վարքագիծ դրսեւորելու պահանջն է. «Քննչական կոմիտեի, քննիչի եւ Դատախազության այսպիսի պահվածքն անհարիր է։ Դուք տեսել եք, թե ինչ անհամաչափ գործողություններ է դրսեւորել ոստիկանությունը։ Սիսակ Գաբրիելյանի նկատմամբ նշանակվել է նաեւ էթիկայի կանոնների խախտման վերաբերյալ քննություն։ Առ այսօր որեւէ ընթացք չի հաղորդվում։ Ոստիկանի նկատմամբ անգամ ծառայողական քննություն չի նշանակվել»։

Մինասյանն ընդգծեց, որ 9 տարի եղել է ԱԺ պատգամավոր եւ գիտի պատգամավորի լիազորությունները. «Երբ ժողովուրդը պահանջում է պատգամավորի հետ հանդիպում, եւ այդ հանդիպման անհրաժեշտությունը պայմանավորված է էմոցիոնալ այնպիսի հարցին, ինչպիսին հայրենիքի դավաճանության մեջ հանրային մեղադրանքն է, պատգամավորն առնվազն պետք է համաչափ վարքագիծ դրսեւորի, այլ ոչ թե ագրեսիվ վարքագիծ»։

Անդրադառնալով այդ օրվա հավաքին՝ Մինասյանն ասաց, որ այնտեղ, որտեղ ինքն է գտնվել, երթեւեկելի մասը փակ չի եղել. «Մարդիկ մայթերի վրա էին, մարդկանց բերման են ենթարկում մայթերից՝ անհամաչափ ուժի կիրառմամբ։ Օրինական պահանջ չի եղել՝ հավաքը դադարեցնելու համար»։

Դատախազը բողոքին անդրադառնալով նշեց, որ ՀՔԾ-ում ընթանում է քննություն Սիսակ Գաբրիելյանի հետ տեղի ունեցած միջադեպով։

«Նշանակվել է Մինասյանի նկատմամբ դատաբժշկական փորձաքննություն, որին նա չի մասնակցել։ Մեր տեղեկություններով՝ Մինասյանը վնասվածքներ չի ունեցել»,- նշեց նա։

Դատախազն ասաց, որ ուսումնասիրվել են տեսանյութերը։

Նա պնդեց, որ քիմնավոր է քրեական գործ չհարուցելը. «Բողոքն անհիմն է, որը ենթակա է մերժման»։

Դատարանը խնդրեց կողմերին դատարան ներկայացնել ամբողջ նյութերը, ինչպես նաեւ քրեական գործ չհարուցելու մասին որոշման հիմքերը, տեսանյութերը։

Դատական նիստը հետաձգվեց եւ նշանակվեց ապրիլի 29-ին։