Եգիպտոսի առաջին կին կապիտա՞նն էր մեղավոր Սուեզի ջրանցքի արգելափակման համար. Meduza

29-ամյա եգիպտուհի Մարվա Էլսելեխդարը մանկուց սիրել է ծովը: Եղբոր նման, նա ընդունվել է Ալեքսանդրիայի Արաբական գիտության, տեխնոլոգիայի և ծովային տրանսպորտի ակադեմիա (AASTMT): Մարվան սովորել է միջազգային տրանսպորտի և լոգիստիկայի ֆակուլտետում: Որոշ ժամանակ անց նա հասկացել է, որ իրեն ավելի շատ հետաքրքրում է ծովային տրանսպորտի և տեխնոլոգիայի ֆակուլտետը, որտեղ սովորում էր իր եղբայրը: Բայց այնտեղ միայն տղամարդիկ էին ընդունվում, գրում է Meduza.io-ն:

Մարվան, այնուամենայնիվ, որոշել է դիմել այս ֆակուլտետ տեղափոխվելու համար: Ակադեմիայի ղեկավարը նախքան նրա դիմումը քննարկելը հանձնարարել է ստուգել, թե արդյոք եգիպտական օրենքները թույլատրում են կնոջը կապիտանի արտոնագիր տալ: Պարզվել է, որ դրանք թույլատրում են:

Մարվան հաջողությամբ հանձնել է ֆակուլտետի քննությունները և դարձել է այնտեղ սովորող առաջին կինը, մասնավորապես, 1200 տղամարդ ուսանողների մեջ միակը: Նա ավարտել է 2013 թվականին, որից հետո աշխատանքի է անցել Եգիպտոսի ծովային անվտանգության վարչությանը պատկանող «Հադես IV» նավում՝ դառնալով կապիտանի երկրորդ օգնականը: Նավը ապրանքներ է մատակարարում Կարմիր ծովի փարոս կղզի և օգտագործվում է AASTMT ուսանողների վերապատրաստման համար:

2015 թվականին Մարվան, որպես հրամանատարական կազմի անդամ, նավարկել է «Հադես IV»-ով, երբ նավը առաջին անգամ նավարկել է ընդլայնված Սուեզի ջրանցքի վրայով: Այսպիսով, նա դարձել է արաբական երկրներից ինչպես ամենաերիտասարդ կին կապիտանը, այնպես էլ առաջին կին նավապետը:

Եվ այն բանից հետո, երբ «Ever Given» բեռնարկղային նավը վթարվել է Սուեզի ջրանցքում և 2021 թվականի մարտի 23-ից արգելափակել էր դրանով երթևեկությունը,համացանցում լուրեր էին սկսել շրջանառվել, որ նավը վարել է հենց Մարվան, չնայած այն բանին, որ նա դեռ շարունակում է ծառայել «Հադես IV»-ում՝ արդեն որպես առաջին օգնական:

Սոցիալական ցանցերում սկսել էր տարածում գտնել Arab News գործակալության հոդվածի էկրանակադրը Մարվայի մասին: Հոդվածն իրական էր, բայց դրա վերնագիրը խմբագրվել էր: Դրանում նշվում էր, որ Եգիպտոսի առաջին կին կապիտանի անունը կապված է Սուեզի ջրանցքի խցանման հետ: Նույն նորությունն ակտիվորեն տարածել են Twitter-ի երեք կեղծ օգտահաշիվները, որոնք ստեղծվել են Մարվայի անունից և մի քանի ժամվա ընթացքում ձեռք բերել ավելի քան 20 հազար հետևորդ: Երիտասարդ կինը ստիպված է եղել հերքել այս տեղեկություններն իր Instagram-յան պաշտոնական միկրոբլոգում և լրատվամիջոցների եթերում:

Մարվան BBC-ի հետ զրուցում հայտնել էր, որ ինքը չգիտի, թե ով է այդ կեղծիքները տարածում:

«Ես կարծում եմ, որ ինձ վրա կարող են հարձակվել այն բանի համար, որ ես այս արդյունաբերության մեջ հաջողակ կին եմ, որը եգիպտացի է: Բայց հաստատ ոչինչ ասել չեմ կարող», - ասել է նա:

Նախկինում Մարվան ասել էր, որ կանայք կազմում են ծովային արդյունաբերությունում աշխատող անձանց միայն 2 տոկոսը, և որ ինքը սեքսիզմի է բախվել ինչպես ուսման ընթացքում, այնպես էլ աշխատանքի ընթացքում:

Օրինակ, նա մերժում է ստացել հավանական գործատուներից, քանի որ նրանցից շատերը պարզապես չէին ցանկանում կանանց վերցնել:

«Մեր հասարակությունում մարդիկ դեռ չեն ընդունում այն գաղափարը, որ աղջիկները կարող են երկար ժամանակ աշխատել ծովում՝ իրենց ընտանիքներից հեռու», - ավելացրել է Մարվան BBC-ի հետ զրույցում:

Նա վախեցել է, թե շրջանառվող լուրերն այն մասին, որ իր նավը արգելափակել է Սուեզի ջրանցքը, վնաս կհասցնեն նրա հեղինակությանը և կփչացնեն իր կարիերան:

Այնուամենայնիվ, բացասական մեկնաբանությունների հետ մեկտեղ նա ստացել է շատ դրական մեկնաբանություններ և որոշել է կենտրոնանալ դրանց վրա:

«Արժե նաև նշել, որ ես ավելի ժողովրդականություն եմ ձեռք բերել, քան նախկինում»,- ասել է Մարվան և հավելել՝ մայիսի պատրաստվում է հանձնել իր ավարտական քննությունը՝ ավելի բարձր կոչումն ստանալու համար:

Ինչպես ավելի վաղ տեղեկացրել էինք, Պանամայի դրոշի ներքո նավարկող, 200 հազար տոննա փոխադրական ծավալով Ever Given բեռնարկղային նավը մարտի 23-ից ամբողջովին արգելափակել է երթևեկությունը Սուեզի ջրանցքի հարավում:

Ըստ սոցիալական ցանցերում լուսանկարների, Չինաստանից ուղևորվում է Հոլանդիայի Ռոտերդամ նավահանգիստ ուղևորվող նավը կանգ է առել ջրանցքի երկայնքով՝ արգելափակելով մնացած նավերի տեղաշարժը երկու ուղղությունով: