«Եթե վերլուծվի, որ ես եմ պատասխանատու վեթինգ չանելու հարցում, պատրաստ եմ կրել քաղաքական պատասխանատվություն». Ռուստամ Բադասյան
Ունենք հաջողություններ, որոնք ինստիտուտցիոնալ մակարդակում են և երևացող չեն հանրության համար, և կա դժգոհություն այս առումով։ Այս մասին լրագրողների հետ ճեպազրույցում ասաց ՀՀ արդարադատության նախարար Ռուստամ Բադասյանը՝ անդրադառնալով դատաիրավական համակարգի բարեփոխումներին։
«Կարծում եմ՝ ամեն կոնկրետ գործընթացի մասով կա կոնկրետ պատասխանատու, և չի կարելի բոլոր հարցերի պատասխանն ակնկալել քաղաքական իշխանությունից, բայց կարծում եմ, որ հանրության հետ հարաբերություններում պետք է ազնիվ լինել և ընդունել, որ որոշ հարցերում մենք ունենք ձախողումներ»,-նշեց նախարարը։
Դիտարկմանը, թե ամենավերին մակարդակով հայտարարվել է, որ «Մարտի 1»-ի գործը բացահայտվել է, իշխանությունը շտապե՞լ է ՝ նման գնահատական հնչեցնելով, Բադասյանն արձագանքեց, թե մեկնաբանվել է՝ ինչ է նշանակում բացահայտվել։
«Մենք հիմա ունենք նոր հանգամանքներ, ՍԴ որոշում, կոնկրետ գործով դատարանի որոշում։ Ես կարող եմ միայն իմ մասով խոսել․ ես հիմնական պատասխանատուն եմ դատաիրավական ոլորտի բարեփոխումների։ Քննադատության հիմնական թիրախն այն է, որ վեթինգ չի կատարվել։ Ես պատրաստ եմ կրել քաղաքական պատասխանատվություն, ինչ որոշում էլ կկայացվի։ Եթե կվերլուծվի, որ ես եմ պատասխանատուն հենց այդ հարցում՝ դատաիրավական բարեփոխումների և, այսպես կոչված, վեթինգը չանելու, պատրաստ եմ կրել պատասխանատվության։ Վեթինգի նախաձեռնության, կոնկրետ բովանդակային թղթին տված տեսքով հանդես է եկել Արդարադատության նախարարությունը, ազնիվ ասել է՝ ինչն է հնարավոր անել առանց սահմանադրական փոփոխությունների, ասել է՝ որ հատվածը կարելի է անել սահմանադրական փոփոխություններով»,-ասաց նա՝ նշելով, թե կարծում է, որ հանրությանը դա չի հետաքրքրում։
«Բացահայտված են այն դերակատարները, որոնք որոշումներ են կայացվել, ինչ հանագամանքներ կան, որ ի հայտ են եկել գործի քննության ընթացքում։ Մենք հիմա նաև աբսուրդի ենք հանգել, երբ ամեն կոնկրետ գործից հետո անդրադառնում են արդարադատության նախարարությանը կամ իր գործունեությանը։ Արդարադատության նախարարությունն արդարադատության իրականացնելու ֆունկցիայի հետ կապ չունի, իհարկե այս տարընկալումն առաջացել է նախարարության անունից, երբ մարդկանց մոտ տպավորություն է ստեղծվում, որ ցանկացած կոնկրետ վեճի լուծման համար պատասխանատու մարմինը արդարադատության նախարարությունն է»,-ասաց նա, ապա անդրադարձավ դատաիրավական համակարգի բարեփոխման ճանապարհին․
«Ես կարող եմ մի բան ասել՝ մեր պայքարը՝ ՀՀ-ում անկախ դատական իշխանություն ստեղծելու, բարեվարք, պրոֆեսիոնալ դատավորներով համալրված դատական համակարգ ստեղծելու, չի ավարտվել, և անձնապես իմ պայքարը չի ավարտվել, ինչ կարգավիճակով էլ դա կլինի»,-ասաց նա։
Անդրադառնալով ՍԴ ճգնաժամի վերաբերյալ իշխանության հայտարարություններին՝ Բադասյանը նշեց, որ երբ ՍԴ-ի ճգնաժամն առաջացել է, մեկանաբանվել է՝ ինչ ասել է ճգնաժամ։
«Ճգնաժամն այն էր, որ ՍԴ-ում կային դատավորներ, որոնք փաստացի ունեին տարբեր կարգավիճակներ, և ՍԴ-ի ճգնաժամը, որի լուծման կապակցությամբ դիմեցինք Վենետիկի հանձնաժողովին, ստացանք իրավական կարծիք, վերաբերում էր այդ ճգնաժամի հաղթահարմանը»,-ասաց նա։
Նա նշեց՝ մինչև «Մարտի 1»-ի գործի քննությունը, երբ խոսք է եղել, որոշ պատասխանատուներ ասել են՝ ունենք անկախ դատական իշխանություն, Բադասյանն ասել է՝ մոտ էլ չեն դրան։
«Խորքային խնդիրներ կան քրեական, վարչական, քաղաքացիական գործերով բոլոր մակարդակներում։ Լուրջ խնդիր կա ՀՀ-ում գործարար միջավայրի առումով, որոնք առնչվում են դատական համակարգին, քաղաքացիական վեճերի քննությանը։ Ես այդ լրջագույն խնդիրների լուծումը տեսել եմ դատաիրավական բարեփոխումների ռազմավարությամբ, մի շարք օրենսդրական նախաձեռնություններով, որոնցով հանդես ենք եկել, ու հիմա պրակտիկայում կիրառվում են»,-ասաց նա։