Ընդդիմություն. Ընտրություններին մեր մասնակցությունը կդառնա դավաճանին հեռացնելու ծրագիր
Ընտրություններին մեր մասնակցությունը կդառնա դավաճանին հեռացնելու ծրագիր: Այս մասին Սեւանում հանրահավաքի ժամանակ լրագրողներին ասաց ՀՅԴ ԳՄ ներկայացուցիչ Իշխան Սաղաթելյանը:
Նա նկատեց, որ ընտրությունները դեռ նշանակված չեն, միայն հայտարարություն է արվել դրանց անցկացման մտադրության մասին: Ընդդիմադիր գործչի խոսքով՝ կան մտավախություններ, որ ընտրություններ չեն նշանակվի:
Սաղաթելյանը չբացառեց, որ իշխանությունը դա կպատճառաբանի կորոնավիրուսի մասին թեզով:
Նա հիշեցրեց Հայրենիքի փրկության շարժման պայքարի երեք փուլերի մասին: Առաջին փուլն իր մեջ ներառում է մինչեւ հրաժարականը ժողովրդի մոբիլիզացում, երկրորդը՝ 14 օրվա ընթացքում դրանից հետո եւ մինչ խորհրդարանը ցրելը: «Երրորդ փուլը կարող է լինել հենց ընտրությունները, սակայն դավաճանի հեռացման գործընթացի տեսքով: Ընտրություններին մեր մասնակցությունը կդառնա դավաճանին հեռացնելու ծրագիր»,-նշեց Սաղաթելյանը:
Նրա խոսքով՝ Հայրենիքի փրկության շարժման դիրքորոշումը չի փոխվել: «Մարզային հանդիպումները շարունակվում են, բացի այդ, Երեւանում մեծ հանրահավաք է պատրաստվում»,-եզրափակեց նա:
Նշենք, որ մարզերում հաջորդ հանրահավաքի մասին դեռ չի հայտարարվել:
Դաշնակցությունը լրագրողներին կոչ արեց Ռոբերտ Քոչարյանի հայտարարության մասին հարցնել հենց իրեն: Այս մասին լրագրողներին ասաց ՀՅԴ ԳՄ ներկայացուցիչ Իշխան Սաղաթելյանը՝ պատասխանելով Ռոբերտ Քոչարյանի՝ կուսակցությունների դաշինքը գլխավորելու եւ ընտրությունների գնալու մտադրության մասին հայտարարությունը:
Նա կրկնեց, որ ՀՅԴ-ն դեռ որոշում չի կայացրել ընտրություններին մասնակցելու մասին:
«Երբ ԳՄ նիստ հրավիրվի եւ ընտրություններին մասնակցելու մասին որոշում կայացվի, մենք այդ մասին կհայտնենք»,-հավելեց Իշխան Սաղաթելյանը: