Ընդդիմության հանրահավաքը Սևանում (Տեսանյութեր)
Այսօր՝ ապրիլի 6-ին ժամը 14:00 -ի մոտակայքում Սևանի կենտրոնում սկսվել է Հայրենիքի փրկության շարժման կազմակերպած հանրահավաքը: Ապրիլի 3-ին ապամոնտաժվել էր Դեմիրճյան փողոցում վրանային ճամբարը:
Ընդդիմադիրները հայտարարել էին, որ մինչեւ ապրիլի 22-ը հանրապետության մարզերում հանդիպումներ են անցկացնելու իրենց կողմնակիցների հետ, որից հետո ակցիաները կվերսկսեն մայրաքաղաքում: Առաջինը Սևանում կազմակերպված հանրահավաքն է:
Սևան քաղաքում «Հայրենիքի փրկության շարժման» հանրհավաքի ժամանակ նախկին վարչապետ Հրանտ Բագրատյանը նշեց, որ ուզում է պատմել, թե ինչու է խորշում, գարշում Նիկոլ Փաշինյանից:
«Ինչու եմ բացահայտ ասում՝ սատկի պրծնենք: Ի վերջո կողքս նստած էր պառլամենտում եւ 5 տարի հետը չէի խոսում: Ինչու ենք ասում՝ ինքը դավաճան է: Մենք չենք ասում՝ անհաջող պատերազմ է ունեցել, ասում ենք՝ դավաճան է: Որովհետեւ մենք շանս ունեինք այդ պատերազմում չպարտվել: Որովհետեւ հենց առաջին օրն իրեն ասվեց՝ պայթեցրու Սարսանգը, վերացրու Մարտակերտի ռազմաճակատը: Էնտեղ հեղեղ էր լինում, եւ դու զորքերը տեղափոխի հարավային ճակատ, որովհետեւ հարավից է գալու թշնամին: Սկզբից թշնամին զրահատեխնիկայով էր ուզում գալ, 10-րդ օրը փոխեց, ինտենսիվացրեց ԱԹՍ-ներով ինձ խփելը: Մենք ասում էինք Իսկանդերով խփի նավթամուղ, գազամուղ պայթեցրու, ինքը չգիտես ինչու խփում էր Գյանջայի 5-հարկանի շենքերին: Մենք ասում էինք՝ ատոմակայանի թափոններ կան, իրենք դա չունեն, լցրու, կրակի, ստեղծի միջուկային զոնա, որ չկարողանա զորքը գա: Ոչինչ չարեց:
Վերջապես հոկտեմբերի 19-ին Պուտինն ասաց՝ Հադրութի կեսը ձեզ մնա, Շուշին էլ ձեզ մնա, կանգնեցնեմ: Այդ դեպքում Լաչին ու Քելբաջարը մեզ էր մնում: Այսինքն 6 հազար քառակուսի կմ մեզ էր մնում:Մարդը պարզ ասաց՝ ավելի լավ է ես հանձնեմ, հետո ժողովրդին խաբեմ, ասեմ՝ պարտվել եմ, որովհետեւ եթե հիմա գնամ զիջման, կասեն՝ դավաճան: Արդյունքում 6 հազար քառակուսի կմ-ից մնաց 2,5-3-ը»,-ասաց Բագրատյանը՝ հավելելով, որ Փաշինյանի ամեն մի շարժումը «փնթի չնթռլոյի շարժում է»:
Նա ընդգծեց, որ Նիկոլ փաշինյանի եւ ԱԺ նախագահ Արարատ Միրզոյանի 2020 թվականի եկամուտները կազմել են յուրաքանչյուրինը 60 հազար դոլար. «Անցյալ տարի միայն պարգեւատրումների համար 120 մ,լն դոլար են ծախսել: Դրանով մենք կառնեինք մոտ 2 հազար փոքր ԱԹՍ կամ 10 հատ «Պանցիր» կամ «Տոռ», որոնք կոչնչացնեին, կփակեին հակառակորդի տարածքը»:
2020-ին բյուջեի եկամուտները պակասել են 19 տոկոսով. այս տարվա երկու ասվա տվյալներով, բյուջեի եկամուտներն արդեն պակաս են 11 տոկոսով, շեշտեց Բագրատյանը:
«Եթե ՀՆԱ-ի մեջ հարկերը պակասել են, նշանակում է կոռուպցիադ ավելացել է, ստվերային տնտեսությունն ավելացել է: Այս տարի լավագույն դեպքում երկրում զրոյական աճ կլինի կամ մեկ տոկոս աճ կունենանք, բյուջետային եկամուտները լավագույն դեպքում կապաս կլինեն 10 տոկոսով:
Եթե ինքը կգա էստեղ կասի, որ ուսուցչի աշխատավարձ եմ բարձրացնում, իմացեք, որ 100 ուսուցչից 5-ի աշխատավարձը կբարձրացնի, հետո քթներից կբերի, որովհետեւ ինքը փող չունի աշխատավարձ բարձրացնելու համար: Ինքը տնտեսություն կազմակերպելու ունակություն չունի: Չի կարելի կրթություն չունեցող, անհավասարակշիռ, հիվանդ մարդուն բերել դնել երկրի ղեկավար ու մի լավ բան սպասել: Երբ սոցիալական խոստումներ կտա ձեզ, ձեռքներիդ տակ ինչ լինի, շպրտեք իր ուղղությամբ»,-ասաց նա:
Ճիշտը, ըստ Բագրատյանի՝ «Հայրենիքի փրկության շարժումն» է, ճիշտը այն է, որ ընտրության չգնանք:
«Ընտրության ժամանակ էդ չնթրլոն արյուն է թափելու: Ես չեմ կասկածում, որ ինքը կպարտվի, բայց ինչի՞ գնանք ընտրության, ինչու ռիսկի ենթարկենք, երբ որ կարելի է ռադ անել էդ մարդուն: 2 շաբաթից շանս է լինելու ընդհանրապես առանց ընտրության իրենից ազատվելու, մենք պարտավոր ենք դա անել: Էս հաղթելուց հետո նոր կմտածենք ոնց ենք վարվում թուրքի հետ»,-ասաց նա՝ հավելելով, որ մենք 3 հազար տարվա մեջ մի անգամ Հադրութ տված չկայինք, թեեւ հազարավոր անգամ թշնամին եկել է Հադրութի վրա: