Որոշ պաշտոնյաներ ձևախեղված պատկերացում ունեն իրենց կարգավիճակի մասին, առանձնանում են լկտի պահվածքով և արդարացնում են բռնությունը. Արման Թաթոյան (տեսանյութ)

Ադրբեջանում մեր ռազմագերիներին ներկայացնում են իբրև ահաբեկիչների՝ քաղաքականացնելով այդ հարցը, այն հեռու պահելով իրավական ատյաններից. հակամարտությունը չի ավարտվել, պատերազմը շարունակվում է, հետևաբար՝ գերիներին չվերադարձնելը հակասում է միջազգային մարդասիրական իրավունքին: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել ՀՀ մարդու իրավունքների պաշտպան Արման Թաթոյանը:

«Ադրբեջանը պարտավոր էր անհապաղ ազատ արձակել և վերադարձնել բոլոր գերիներին, եթե անգամ եռակողմ հայտարարության մեջ այդ մասին որևէ դրույթ չլիներ, դա ոչ թե բարի կամք է, այլ միջազգային պարտավորություն: Ադրբեջանը գնում է սակարկությունների, ակնհայտ է, որ նրանք մտադրված փորձում են հոգեկան տառապանք պատճառել մեր հայրենակիցներին, գերիների ու անհետ կորածների բարեկամներին: Մենք պետք է միջազգային հանրությանը ճիշտ ներկայացնենք այս հարցի էությունը»,- ասել է օմբուդսմենը:

Ըստ Թաթոյանի՝ ներքաղաքական խոսույթում առկա է ատելության խոսքի ուժգնացում, և իշխանությունը պատասխանատվություն է կրում այս մթնոլորտի համար. «Անհանդուրժող, բևեռացված մթնոլորտ է, բոլոր կողմերը պետք է ջանքեր գործադրեն, որ այս նախընտրական գործընթացն անցնի հանդուրժողականության մթնոլորտում: Քաղաքական համակարգն իշխանավեճի համար չէ, մարդու իրավունքների մասին խոսքն ուշադրության չի արժանանում: Կեղծ օգտատերերի արշավներն էլ ակնհայտորեն ուղղորդված միանում են ատելության խոսքին: Ոչ ոք իրավունք չունի վիրավորելու քաղաքացուն կամ այլ քաղաքական ուժի կողմնակիցների»:

Մարդու իրավունքների պաշտպանի կարծիքով՝ հանրային գործիչները, հատկապես պաշտոնյաները, պետք է իրենց խոսքում պատասխանատու լինեն. «Պաշտոնյան պետք է նկատի ունենա իր ցանկացած խոսքի բոլոր իմաստները, որ հետո չհերքի ինքն իրեն: Յուրաքանչյուր հանրային գործիչ իրեն պետք է պատասխանատու զգա, բացառի վիրավորանքները: Հանրային իշխանությունը պարտավոր է ամեն ինչ անել, որ բոլոր գործընթացներն ընթանան սահմանադրական և մարդու իրավունքների պաշտպանության հիմքերի պահպանմամբ»:

Արման Թաթոյանի պնդմամբ՝ մենք երբեք չպետք է թողնենք, որ մեզ թմրեցնեն ադրբեջանական կեղծ խաղաղասիրությամբ. «Մեր հարևան Ադրբեջանն ու Թուրքիան ամեն առիթ ման են գալիս, որ էթնիկ զտումներ իրականացնեն, դրա վրա խրախճանք կազմակերպեն, հետևաբար՝ մենք պետք է ըստ այդմ արձագանքենք: Ալիևն ընդգծում է, որ իրենց երիտասարդությունն ատելությամբ է լցված թշնամու հանդեպ, ասում է՝ մենք հայերին քշում ենք շների պես, նրանք ուղեղ չունեն, բարոյականություն չունեն»:

Օմբուդսմենի պնդմամբ՝ դատապարտելի է, որ որոշ պաշտոնյաներ ձևախեղված պատկերացում ունեն իրենց կարգավիճակի մասին, խրախուսում են բռնությունը, դա խորքային չիմացություն է: «Այս երևույթն արտահայտվում է հանրային դաշտում բռնությունը խրախուսելով, պետք է կանխարգելիչ աշխատանքներ տանել: Հատկապես անհանգստացնող է լկտի պահվածք ունեցող, բռնությունն արդարացնող պաշտոնյաների խոսքը, դա դատապարտելի է»,- ամփոփել է Արման Թաթոյանը: