Մեր քաղաքական պատմության մեջ երևի եզակի դեպքերից է, որ Խորհրդարանում մեծամասնությունն ինքն իրենով ընտրական օրենսգիրք է ընդունում. Անի Սամսոնյան (տեսանյութ)
Մենք չենք գնում արտահերթ ընտրությունների մի քանի պատգամավորական տեղեր վերցնելու, հետևաբար՝ մեր բոլոր հնարավորությունները պիտի օգտագործենք: Եվ այն 47 տոկոս չկողմնորոշված մարդիկ, որոնք այսօր կան և չգիտեն՝ ում են ընտրելու, հիմա յուրաքանչյուր քաղաքական ուժի առաջադրանքը պետք է լինի այդ մարդկանց համոզել՝ իրենց ընտրելու. այսօր լրագրողների հետ հանդիպման ժամանակ ասաց «Լուսավոր Հայաստան» խմբակցության պատգամավոր Անի Սամսոնյանը՝ պատասխանելով հարցին, թե երկուսուկես տարի առաջ ստացան այնքան ձայն, որ կարողացան հաղթահարել անցողիկ շեմը, ի՞նչու է կարծում, որ իրենց կտան այնքան քվե, որ իշխանություն դառնան:
«2018 թվականը և 2021 թվականը լրիվ տարբեր քաղաքական իրավիճակներ են, և պետք չէ համեմատել: 2018 թվականին մենք չենք ասել, որ մենք լինելու ենք իշխանություն, որովհետև տեղի էր ունեցել հեղափոխություն, և այդ ուժը պետք է լիներ իշխանություն, հիմա իրավիճակն այլ է»,-ընդգծեց նա:
Լրագրողի դիտարկմանը, թե Էդմոն Մարուքյանը նշել է, որ այս Ընտրական օրենսգիրքն ընդունվել է առանց կոնսենսուսի, և ընտրությունների լեգիտիմությունը կասկածի տակ է դրվում, Սամսոնյանը նշեց, որ չի կարող խոսել ընտրության արդյունքների մասին, որովհետև ընտրությունները դեռ տեղի չեն ունեցել, բայց ամեն բան հնարավոր է. «Այս օրենսգիրքն ընդունվել է ոչ բոլոր քաղաքական ուժերի կոնսենսուսով, սա երևի մեր քաղաքական պատմության մեջ եզակի դեպքերից է, որ խորհրդարանում մեծամասնությունն ինքն իրենով ընտրական օրենսգիրք է ընդունում և ոչ մեկը դրա հետ համաձայն չէ: Եթե քաղաքական ուժերի սրտով չէ այդ Ընտրական օրենսգիրքը, միգուցե առաջանա լեգիտիմության հարց, որի մասին կարող ենք խոսել ընտրություններից հետո»:
Հարցին, թե Թուրքիայի հետ երկխոսության ի՞նչ եզրեր իրենք կփորձեն գտնել, պատգամավորը պատասխանեց, որ իրենց ներկայացվելիք ծրագրում կլինի անվտանգության և արտաքին քաղաքականության վերաբերյալ լուծումների և պատկերացումների մասին.
«Ես կարծում եմ, որ այս հարցին պետք է մոտենալ շատ հավասարակշված ու հանդարտ կերպով՝ առանց պարզունակ մոտեցումների՝ դուրս գալով «Թուրքիան մեր թշնամին է կամ մեր թշնամին չէ» պատկերացումից: Մենք ունենք արտաքին և ներքին անվտանգության լուրջ խնդիրներ և չենք կարողանում մեր հարաբերությունները նորմալ կարգավորել մեր բարեկամ երկրների հետ, ուր մնաց, թե մեր հակառակորդ երկրների հետ, երբ ամեն օր մեզ ֆիզիկապես սպառնում են: Թե՛ Ադրբեջանի նախագահը և թե՛ Թուրքիան օրեցօր իրենց հռետորաբանությամբ մեզ սպառնում են»:
Հարցին, թե Թուրքիային թշնամի համարում է, Սամսոնյանը պատասխանեց.
«Բնականաբար, եթե մեկը քեզ սպառնում է ֆիզիկապես ոչնչացնել, դու ինչպե՞ս կարող ես իր նկատմամբ բարեկամաբար տրամադրվել: Ինչո՞ւ են այդ խաղաղասիրական կոչերը մեզ պարտադրվում, մե՞նք ենք ագրեսիա ցուցաբերում, մենք խաղաղասիրության ձգտման խնդիր չունենք, թող խաղաղասիրության կոչեր պարտադրեն նրանց, ովքեր մեզ սպառնում են ֆիզիկապես ոչնչացնել, իսկ ովքեր սպառնում են մեր անվտանգությանը, մենք պետք է ուժեղանանք, որպեսզի ամեն պահի պատրաստ լինենք հակահարված տալու»: