Գործ ունենք ոչ թե սովորական քրեական գործի, այլ քաղաքական հետապնդման հետ. Ռուբեն Մելիքյանը՝ նոյեմբերի 9-ի գործով կալանավորված Հակոբ Բերբերյանի մասին

Նոյեմբերի 9-ի լույս տասի գիշերը Կառավարության շենք մուտք գործած, զանգվածային անկարգություններ իրականացրած անձանց մասով քրեական գործ է հարուցվել: Ազգային անվտանգության ծառայությունը 2020 թվականի նոյեմբերի 18-ին ձերբակալել է Հակոբ Բերբերյանին և նոյեմբերի 21-ին մեղադրանք է առաջադրվել ՔՕ 225-րդ հոդվածի երկրորդ մասով, այսինքն՝ զանգվածային անկարգությունների մասնակցի կողմից բռնություն գործադրել, ջարդ, գույք վնասել և այլն: «Հայելի ակումբ»-ում նշեց Հակոբ Բերբերյանի հանրային պաշտպան Ֆերդինանդ Սարգսյանը:

Նրա խոսքով՝ ձերբակալման 72 ժամը լրանալուց հետո վարույթ իրականացնող մարմինը միջնորդություն է ներկայացրել Երևան քաղաքի ընդհանուր իրավասության դատարան՝ որպես խափանման միջոցը կալանավորում ընտրելու համար։

Փաստաբանի խոսքով՝ երբ անձի նկատմամբ խափանման միջոց ընտրվում է կալանավորումը, պետք է բարձր լինեն հիմքերը, սակայն Հակոբ Բերբերյանը երկուսուկես ամիս գտնվել է ազատության մեջ, որևէ ոչ իրավաչափ որոշում չի ցուցաբերել , սակայն Երևանի ընդհանուր իրավասության դատարանը՝ Մնացական Մարտիրոսյանի նախագահությամբ, որպես խափանման միջոց կալանավորում որոշման մեջ արձանագրել է, որ եթե նա գտնվի ազատության մեջ, ապա մեծ է հավանականությունը, որ անձը կխոչընդոտի նախաքննությանը, քանի որ այդ գործով չեն հայտնաբերվել մի շարք անձիք, բացի դա, կթաքցնի իրեր, որոնք գործի համար կարևոր նշանակություն ունեն:

«Այսինքն՝ անձը երկուսուկես ամիս գտնվել է ազատության մեջ, տեղյակ լինելով, որ ներգրավված է սույն քրեական գործով, որևէ ոչ պատշաճ վարքագիծ չի ցուցաբերել, սակայն դատարանը գտել է, որ հիմնավոր է քննիչի այն մտավախությունը, որ հնարավոր է, մնալով ազատության մեջ, բերբերյանը կարող է խոչընդոտել: Հակոբ Բերբերյանի կողմից որևէ գույք չի ոչնչացվել կամ տեղաշարժվել, դռան բռնակը իջեցնելն ու բարձրացնելը դիտել են գույքի ոչնչացում»,- ասաց Սարգսյանը:

Իրավապաշտպան Ռուբեն Մելիքյանը, անդրադառնալով Հակոբ Բերբերյանի կալանավորմանը, նշեց, որ Հակոբ Բերբերյանին երկու էպիզոդում են մեղադրում, և դրանցից որևէ մեկը ֆիզիկական բռնություն կամ գույքի ոչնչացնել իր մեջ չի պարունակում:

«Մեղադրում են մի մարդու, որը 44 օր կամավոր մասնակցել է պատերազմին: Բա մարդ, որին 44 օր անընդհատ ասում են՝ հաղթելու ենք, հաղթում ենք, հաղթել ենք, լսելով այս խայտառակ կապիտուլյացիայի մասին, ի՞նչ են մտածում քաղաքացիները, տարօրինա՞կ է, որ այդ մարդը գալիս է կառավարություն հարցեր տալու համար: Նա պատերազմի 44 օրը մասնակից է, նա ամբողջ դժոխքը անցած մարդ է՝ Ֆիզուլիից մինչև Շուշի, նա այն վերջին հայերից է եղել, որ Շուշիից դուրս է եկել, բա այդ մարդը գնացել է այդտեղ՝ հարցեր ուղղելու, բռնել եք այսքան ժամանակ պահում եք, սա հակահայկական քաղաքականություն է: Դրա համար Բերբերյանը համարվում է ոչ միայն քաղաքական բանտարկյալ, այլև ազգային բանտարկյալ: Գործ ունենք ոչ թե սովորական քրեական գործի, այլ քաղաքական հետապնդման հետ»:

Մելիքյանը նշեց, որ Նիկոլ Փաշինյանը ֆեյսբուքյան հայտարարության մեջ անդրադարձել է իր կեցավայրից գողացված իրերին և իր հայտարարությամբ ցուցում տվել կալանք կիրառել այդ անձանց նկատմամբ, որից հետո Վերաքննիչ դատարանը բեկանել է ընդհանուր իրավասության առաջին ատյանի դատարանի օրինական որոշումը և փետրվարին տեղի է ունեցել կալանավորումը: