«Վրաստանը երկիր է, ոչ թե խինկալանոց». Բուրջանաձեն մեկնաբանել է ծնունդը նշելու նպատակով Պոզների աղմկահարույց այցը Թբիլիսի

Վրաստանի իշխանությունները և նախկին վարչապետ Բիձինա Իվանիշվիլին ցանկանում էին Վլադիմիր Պոզների Թբիլիսի կատարած այցից օգտվել փիառ նպատակներով: Այս մասին հայտարարել է «Միացյալ Վրաստան» կուսակցության նախագահ Նինո Բուրջանաձեն` մեկնաբանելով ռուս լրագրողի` Թբիլիսի կատարած այցի հետ կապված բողոքի ակցիաները, գրում է EADaily լրատվականը:

«Նրանք պետք է իմանան, որ Վրաստանը փոքր է, բայց սա երկիր է, սա ռեստորան կամ խինկալանոց չէ, որտեղ կարող ես մտնել 50 հոգով և խախտել կանոնները»,-ասել է Բուրջանաձեն «Պալիտրանիուս» հեռուստաալիքի եթերում:

Ըստ վրացի քաղաքական գործչի, երբ բողոքում են երիտասարդները, «դժվար է վերահսկել արտահայտման ձևը և բառերը, բայց այն, որ հույզ կա, հասկանալի է»:

«Կառավարությունը պետք է գործի այնպես, որ երիտասարդները չունենան զգացողություն, թե կառավարությունը այս երկիրը վերածել է ռեստորանի: Երիտասարդներն ունեն այն զգացումը, որ կառավարությունն իրեն այնպես է պահում, որ ոչ ոք չի ցանկանում գալ երկիր, որի մայրաքաղաքից 20 րոպեի հեռավորության վրա գտնվում են ռուսական զորքերը: Եթե երիտասարդներն ունենային այն զգացողությունը, որ երկիրը չի վերածվել բանջարանոցի և Իվանիշվիլիի ռեստորանի, որտեղ կարելի է 50 հոգով գնալ՝ խախտելով կորոնավիրուսային սահմանափակումների կանոնները և տոնել, երբ ամբողջ երկիրը փակ է, ապա այս բողոքը տեղի չէր ունենա»,-ասել է Բուրջանաձեն:

Պոզներն իր հյուրերի հետ ապրիլի 1-ի գիշերը ժամանել էր Թբիլիսի և պատրաստվում էր այնտեղ մնալ 3 օր: Այնուամենայնիվ, ակտիվիստները ցույց էին կազմակերպել այն հյուրանոցի մոտ, որտեղ նա կանգ էր առել: Ոստիկանության ուղեկցությամբ նա տեղափոխվել է մեկ այլ հյուրանոց, բայց ցուցարարները չեն հանդարտվել ու ձվերով հարվածել են շենքին: Պոզները վերադարձել է Վրաստանից: Հյուրանոցը, որտեղ Պոզներն էր բնակվում, տուգանվել է 10 հազար լարիով ՝ կորոնավիրուսի համավարակի հետ կապված սահմանափակումները խախտելու համար:

Վրաստանի վարչապետ Իրակլի Ղարիբաշվիլին հայտարարել է, որ Պոզների այցի դեմ բողոքները հրահրել են ընդդիմադիր «Միացյալ ազգային շարժում» կուսակցությունը և դրա առաջնորդ Միխեիլ Սաակաշվիլին: Նա դա անվանել է Վրաստանի հեղինակության խաթարում, երբ երկիրը սկսել է մասամբ բացվել զբոսաշրջիկների առջև: Ցուցարարների գործողությունները, ըստ Ղարիբաշվիլիի, դուրս են եկել «քաղաքակրթական նորմերից և վրացական չափանիշներից»: