Ֆրանսահայ բժիշկների «Առողջություն Հայաստան» կազմակերպությունը բացառիկ վիրահատություններ է անցկացնում
Վիրահատական նշտարը Փարիզի «Նեկեր» հիվանդանոցի հայտնի պրոֆեսոր Եղյա Կարապետյանի ձեռքին է: Վիրահատությունը Երևանում է կատարվում: Երեկ էլ է անընդհատ վիրահատել, վաղն էլ է վիրահատելու: Քիթ-կոկորդ-ականջաբանության ոլորտում ֆրանսահայ առաջատար մասնագետի հետ մեզ այդպես էլ չհաջողվեց զրուցել, պրոֆեսորը վիրահատարանից այդպես էլ չկարողացավ դուրս գալ: Պատերազմի ժամանակ բազմաթիվ զինվորներ լսողական լուրջ խնդիրներ են ձեռք բերել: Հայաստանցի գործընկերների հետ պրոֆեսոր Կարապետյանը բացառիկ վիրահատություններ է անում:
Արթուր Շուքուրյան, «Էրեբունի» ԲԿ քիթ-կոկորդ-ականջ հիվանդությունների բաժանմունքի ղեկավար - Մենք կարողանում ենք վերականգնել թմբկաթաղանթները, լսողական ոսկրիկները, որը հնարավորություն կտա զինվորներին վերականգնել իրենց լսողությունը: Ամեն այցի ժամանակ փորձում ենք կատարել այն յուրահատուկ վիրահատությունները, որոնք բնորոշ են իսկապես առաջատար կլինիկաներին:
Ֆրանսիայի հայտնի բժիշկները դարձյալ Հայստանում են հենց այդ նպատակով. բժշկությունը Հայաստանում դարձնել միջազգային մակարդակի: Միավորվել են ու «Առողջություն Հայաստան» կազմակերպություն հիմնել: Աուտոիմուն հիվանդությունների մասնագետից մինչև քիթ-կոկորդ-ականջաբան այս օրերին Հայաստանի գործընկերների հետ տարբեր բուժկենտրոններում խորհրդակցություններ են անցկացնում, հետազոտություններ ու վիրահատություններ անում:
Արսեն Մեքինյան, Աուտոիմուն հիվանդությունների մասնագետ, «Սանտե Աղմենի» կազմակերպության հիմնադիր - «Սանտե Արմենիի» հիմնական նպատակը հիվանդների բուժումն է, և այդ կապակցությամբ տարբեր մասնագետների խմբեր են ստեղծվել, որպեսզի հազվագյուտ հիվանդություների դեպքում, օրինակ, ճիշտ օգնություն լինի: Մեր մասնագետները պատերազմի օրերից սկսած տարբեր մարզեր են գնում այդ նպատակով: Մենք նաև աշխատում ենք կլինիկական հետազոտությունների ուղղությամբ, որպեսզի դրանց արդյունքում Հայաստան բերենք դեղորայք, որն այստեղ դեռ չկա:
«Առողջություն Հայաստան» կազմակերպությունը հիմնադրվել է Հայկական բարեգործական ընդհանուր միության հետ համատեղ: Եվրոպայի և Ֆրանսիայի մասնաճյուղի տնօրենը նույնպես բժիշկ է և այս օրերին խմբի հետ Հայաստանում է:
Նադյա Գործունյան, ՀԲԸՄ Եվրոպայի և Ֆրանսիայի մասնաճյուղի տնօրեն - Հայկական բարեգործական միությունն առնչվում է և՛ կրթական, և՛ առողջապահական ոլորտների հետ: Մենք տասնամյակների փորձ ունենք այդ բնագավառներում, և հենց այդ փորձն էլ կարող ենք ներդնել «Սանտե Աղմենիի» գործունեության համար:
Ֆրանսահայ բժիշկների խմբի՝ Հայաստանի առողջապահության ոլորտը զարգացնելու ծրագրերը հեռանկարային են: Դրանք քննարկելու համար այսօր նաև հանդիպումներն էին առողջապահության նախարարի և բժշկական համալսարանի ռեկտորի հետ: