Անկարային ու Բաքվին հաջողվեց Հայաստանի իշխանության ղեկին ունենալ մեկին, որը քաղաքականապես անպատրաստ է, արկածախնդիր է, փառասեր և տառապում է եզակի լինելու մոլուցքով. Աբրահամ Գասպարյան (տեսանյութեր)
Եթե Էկոնոմիկայի նախարարը հանձնարարական է ստացել, որ պիտի փայլեցնի իր ղեկավարի դեմքը կամ համոզված է, որ փուչիկ խոստումներով կարող է ազդել մարդկանց տրամադրությունների վրա, կամ հավատում է, որ ստելով՝ քվե կբերի իր ղեկավարին: Լու՞րջ, անցած տարի նահանջ տարի էր և այդ իսկ պատճառով՝ մեկ օրվա տարբերության պատճառով՝ տնտեսությունն ավելի լավ էր շնչում, քան ա՞յս տարի: Այս մասին «Արմնյուզ» հեռուստաընկերությամբ հեռարձակվող «Երեկոյան լուրեր Աբրահամ Գասպարյանի հետ» հաղորդման ժամանակ ասել է հեղինակ Աբրահամ Գասպարյանը։
«Տեսնես վարչապետի աթոռը զբաղեցնողը հավատո՞ւմ է իր նշանակած նախարարի ասածին, թե՞ ինչպես միշտ հումորի է տալիս, կամ՝ իր հետ համաձայնեցված է, կամ էլ՝ իրապե՞ս հավատում է, քանի որ Վահան Քերոբյանն առաջիններից էր, որ համբուրեց կապիտուլյացիայի ղազագիրը և պատերազմից հետո խոսեց Թուրքիայի ու Ադրբեջանի հետ տնտեսական կապերը վերականգնելու, սահմանները բացելու, տարածաշրջանի կոմունիկացիաները վերականգնելու մասին»,- ասել է Գասպարյանը:
Գասպարյանը նշել է՝ Հայաստանի մասին Փաշինյանի պատկերացումները կամ շատ պարզունակ են, կամ էլ իր բնորոշմամբ՝ թուրքական արտադրության, որովհետև այդ պրիմիտիվությամբ էլ նա խաբում ու մոլորեցնում է մեր հանրությանը. «Ինչ է՝ վարչապետի աթոռն զբաղեցնողն ու նրա ուսապարկերը չգիտե՞ն, որ Թուրքիան ու Ադրբեջանը Հայաստանը դիտարկում են որպես հողաթումբ, տարածք, կամուրջ, որի միջոցով իրար հետ պիտի կապ հաստատեն և վերջ, Թուրքիան պիտի Կասպից ծով դուրս գա և վերջ, պիտի կապվի Միջին Ասիայի հետ և վերջ, այնտեղ չեզոքացնի ռուսական գործոնը և վերջ, հասնի-կպնի Չինաստանի Նոր Մետաքսի ճանապարհին և վերջ: Դուք՝ որպես իշխանություն, Թուրքիային ու Ադրբեջանին դրանով եք հետաքրքիր, ընդամենը միջոց, գործիք»:
Աբրահամ Գասպարյանն ընդգծել է՝ Անկարային ու Բաքվին հաջողվեց Հայաստանի իշխանության ղեկին ունենալ մեկին, որը քաղաքականապես անպատրաստ է, արկածախնդիր է, փառասեր, տառապում է եզակի լինելու մոլուցքով: Նրա բնորոշմամբ՝ այսպիսիներին շատ հեշտ է մոլորեցնել քաղաքականության մեջ:
«Փաշի՛նյան, չլինի՞ այնքան միամիտ եք ու կուրորեն հավատում, որ թուրքը փոխվել է և ժամանակակից թյուրքական այս պետությունները նպաստելու են Հայաստանի տնտեսական աճին կամ զարգացմանը: Թեև ինչու՞ զարմանալ, եթե 20 տարի ձեր հայեցակարգը դա է եղել, թուրքի հետ քիրվայություն եք քարոզել՝ առանց մտածելու ռիսկերը չեզոքացնելու մասին: Ադրբեջանը Երևանն է համարում իր արևմտյան մայրաքաղաքը: Մոռացա՞ք ձեր կիրթ ու գրագետ Ալիևը Մյունխենում անցած տարի ի լուր աշխարհի ձեզ ինչպե՞ս նվաստացրեց, երբ այդ տխրահռչակ ռեալիթի շոուի ժամանակ Երևանի ու Զանգեզուրի մասին խոսեց, դուք էլ ասացիք՝ կարևորը Ադրբեջանում մինի հեղափոխություն լինի ու Արցախի հարցի լուծումը նաև ձեռնտու լինի Ադրբեջանի ժողովրդի համար: Ադրբեջանի մղումների նույնիսկ ռեֆերատ գրող առաջին կուրսեցին չի հավատում, քանի որ քաղաքականությունից մի փոքր հասկացող հայը շատ լավ էլ գիտի, որ Անկարան ու Բաքուն Հայաստանը չեն դիտարկել և երբեք չեն դիտարկելու որպես գործընկեր, երբեք Հայաստանի հետ չեն բանակցելու հավասարը հավասարի, քանի որ Հայաստանն իրենց համար ոսկոր է պանթյուրքիզմի կոկորդում»,- դիմելով Փաշինյանին՝ ասել է Գասպարյանը:
Գասպարյանը, դիմելով իշխանությանը, նշել է՝ նորմալ ստելու արվեստն էլ եք մոռացել ու սկսել եք ստել նույնիսկ այն դեպքերում, երբ դրա կարիքը չկա. «Սու կործանիչների պատմությունը վկա…դեռ չեմ խոսում Արցախում տիրող վիճակի մասին ձեր լռության, Կարմիր շուկայով ադրբեջանցիների՝ ճանապարհ պոկելու հարցի մասին: Եվ այդքանից հետո դուք կարող եք խոսել հայ-ադրբեջանական անվտանգ համակեցության մասի՞ն, և այդքանից հետո ձեր ուսապարկերին թելադրում եք փնովել ու ծաղրել ազգային մտածողություն ունեցողներին, որոնք ասում են՝ այդ համակեցությունը խախուտ է ու հնարավոր չէ այս պատերազմից հետո: Վստահ եմ՝ շատերդ այսօր տեսաք, թե Մեխակավանում բրիտանական BBC հեռուստաընկերությունն ինչ ռեպորտաժ էր պատրաստել և անդրադարձել Սուրբ Զորավոր Աստվածածին եկեղեցու անհետացմանը: Եվ այսպիսի դեպքերի պատճառո՞վ է, որ չեք կանգնում ու ասում, որ Հայաստանն Արցախի անվտանգության երաշխավորն է»,- ասել է Գասպարյանը, և դիմելով Փաշինյանին՝ ասել. «Դուք ընդամենը մեկ լավ գործ արեցիք՝ սերունդներին ապացուցեցիք՝ ինչպես չպետք է լինի երկրի ղեկավարը»: