Շատ կուսակցություններից առաջարկ եմ ստացել, սակայն այս փուլում հակված եմ չշարունակել պատգամավորական գործունեությունս, քանի դեռ բարոյական կառավարություն չի ստեղծվել․ Սոֆյա Հովսեփյան (տեսանյութ)
Ընտրական օրենսգրքի այն փոփոխությունները, որոնք առաջարկվում են, կարծում եմ, չեն հասցնի իրականացնել մինչև ընտրություններ, որովհետև խնդրահարույց կետեր կան, միևնույն ժամանակ ընտրակարգի այն տարբերակը, որը այս պահին ներկայացված է, ևս խնդրահարույց է։ Այս մասին լրագրողների հետ ճեպազրույցի ժամանակ ասաց ԱԺ անկախ պատգամավոր Սոֆյա Հովսեփյանը՝ անդրադառնալով Ընտրական օրենսգրքում փոփոխություններ կատարելու վերաբերյալ լրագրողների հարցին։
Դիտարկմանը՝ եղել է առաջարկ որևէ կուսակցությունով ընտրություններին առաջադրվելու վերաբերյալ, պատգամավորը պատասխանեց․ «Շատ կուսակցություններից եմ առաջարկներ ստացել, սակայն քննարկումների չեմ գնացել, քանի որ այս պահին նպատակահարմար չեմ գտնում։ Ավելի շատ հակված եմ որպես պատգամավոր չշարունակելու գործունեությունս։ Մինչև բարոյական կառավարություն չստեղծվի այս երկրում, չարժե քաղաքականությամբ զբաղվել։ Փաստացի այն ուժերը, որ մինչև օրս ստեղծվել են, այդ բարոյականությունը չունեն»։
Անդրադառնալով ներկա իշխանությունների կողմից խորհրդարանում մեծամասնություն կազմելու հավանականությանը, պատգամավորը ընդգծեց, թե չի ցանկանա, «որովհետև մի իշխանություն, որը կարող է քեն պահել մարդկանց հետ՝ չգիտակցելով ժողովրդի շահեր հասկացողությունը, ապա այդ իշխանությունը պետք է երկրի երեսից վերանա»։
«Արդեն երկրորդ անգամն է՝ կառավարության հետ հարցուպատասխանի ժամանակ իմ հարցին հարկ չեն համարում պատասխանել և պահանջում են գրավոր ներկայացնել։ Ես իշխանություններից հիասթափված չեմ, պարզապես օր օրի բացահայտում եմ, թե որքան կարող են պրիմիտիվ լինել։ Մինչև ընտրություններ չեմ պատրաստվում վայր դնել մանդատս և թույլ տալ, որ կոճակ սեղմող ինչ-որ մեկը գա և զբաղեցնի իմ տեղը»։
Սոֆյա Հովսեփյանը չցանկացավ մեկնաբանել ԱԺ փոխնախագահ Ալեն Սիմոնյանի այն հայտարարությունը, որ ինքը երբևէ աչքի չի ընկել պատգամավորական ակտիվ գործունեությամբ՝ խորհուրդ տալով իշխանական պատգամավորներին լռել և «լեզուները չերկարացնել»։
Խոսելով մարզերում իշխանական թիմի կողմից պարբերաբար հնչեցվող իրենց բարձր վարկանիշի մասին՝ Հովսեփյանը նշեց․ «Մարզերում իշխանական թիմի մասին անգամ չեն խոսում, որովհետև թիմի եզակի անձանցից են տեսել բարոյական վարքագիծ։ Ինչ վերաբերում է Նիկոլ Փաշինյանին, ապա այո, կան մասսաներ, ովքեր անհատապաշտությամբ են խոսում Նիկոլ Փաշինյանին մասին։ Իսկ առհասարակ Նիկոլ Փաշինյանի քաղաքական ուղին ինձ չի հետաքրքրում»։