Ի՞նչ տարբերություն՝ տղայիս կողքին կլինեմ, թե մեկ այլ տղայի․ Հայր և որդի Կարապետյանները զոհվել են մեկ օրվա տարբերությամբ
Հայր և որդի Կարապետյանները Արցախյան վերջին պատերազմում զոհվել են մեկ օրվա տարբերությամբ՝ սկզբում որդին, ապա՝ հայրը։ Հայրը՝ 56-ամյա Էդիկ Կարապետյանը սեպտեմբերի 29-ին կամավոր մեկնել էր ռազմաճակատ, որդին՝ Արմենը, ժամկետային զինծառայող էր։
«Ամուսինս 1988 թվականից մասնակցել է Արցախյան շարժմանը, հետո արդեն պատերազմին։ Մասնակցել է նաև Ապրիլյան պատերազմին։ Պատերազմի ժամանակ 26 տարեկան էր։ Իրենք արմատներով Գորիսից էին, ասաց՝ գնում եմ Գորիսը պաշտպանելու և դրանից հետո արդեն գնացել է Քարվաճառ։ Ականապատված դաշտից չորսհոգանոց ընտանիք է հանել, և ոչ ինքն է վնասվել, ոչ այդ ընտանիքի անդամները։ Պատերազմի ընթացքում բեկորային երկու վիրավորում էր ստացել, կանտուզիա էր տարել, հաշմանդամության կարգ ուներ»,- NEWS.am-ի հետ զրույցում պատմեց Ալինա Կարապետյանը։
Էդիկ Կարապետյանն իր հետ պատերազմից մի քանի ալբոմներ էր բերել, որտեղ նկարված էին այն տարածքները, որտեղ իրենք եղել են, իսկ նկարների տակ գրված են նրա հուշերը և պատմությունները։
«Նկարները պատկերել է ամուսնուս զինվորը, իսկ պատմությունը գրել է ինքը։ Պատերազմի դաշտում Էդիկը շուն ուներ՝ անունն Ամուռ․ դրա համար իրեն «Շուն Էդո» էին ասում։ Երբ սարի վրա դիպուկահար էր լինում, շունը զգում էր և այդ ուղղությամբ հաչում։ Պատերազմից հետո ամուսինս շանը բերեց տուն»,- նշեց Ալինա Կարապետյանը։
Արմեն Կարապետյանը բանակ զորակոչվել է 2019 թվականի հուլիսի 12-ին, ծառայել է Խնձորեսկում որպես վարորդ, պատերազմի ժամանակ տեղափոխվել է Ջաբրայիլ։
«Որդիս շատ ծանր տարավ ամուսնուս՝ պատերազմ մեկնելու լուրը, ասում էր՝ պապ, սա 90-ականների պատերազմը չէ, սա այլ է։ Ամուսինս էլ ասում էր՝ ի՞նչ տարբերություն՝ տղայիս կողքին կլինեմ, թե մեկ այլ տղայի, կարևորը պատերազմի դաշտում կլինեմ»,- ասաց Ալինա Կարապետյանը։
Արմեն Կարապետյանը զոհվել է հոկտեմբերի 2-ին Ջաբրայիլում, Էդիկ Կարապետյանը՝ հոկտեմբերի 3-ին Քարվաճառում։ Երկուսն էլ զոհվել են անօդաչու թռչող սարքի հարվածից։
«Հայրը չի իմացել, որ որդին զոհվել է։ Վերջին անգամ խոսել են հոկտեմբերի 2-ի ցերեկը։ Որդին հոր համար է հանգիստ եղել, հայրը՝ որդու»,- նշեց Ալինա Կարապետյանը։
Հայր և որդի Կարապետյանները հուղարկավորվել են հոկտեմբերի 6-ին «Եռաբլուրում»։