Նոյեմբերից մինչև փետրվարի վերջ ձուն թանկացել է մոտավորապես 20 տոկոսով, սակայն Զատիկին ընդառաջ մենք կոչ ենք անում խուճապի չմատնվել, շատ ձու չգնել, քանի որ գնի բարձրացում չի նախատեսվում. Ս․ Ստեփանյան

Վերջին 15-20 օրվա ընթացքում ձվի շուկայում թանկացում չի եղել: Այս մասին Tert.am-ի հետ զրույցում ասաց Թռչնաբույծների միության նախագահ Սերգեյ Ստեփանյանը՝ անդրադառնալով ձվի շուկայի գների փոփոխությանը: «Սպառման խոշոր ցանցերում 66-68 դրամ է, ձվի բացթողման գինը 58-60 դրամ է, դրանից հետո թանկացում չի եղել: Փոքր խանութներում 75-85 դրամ է, նրանք խոշոր առևտրի ցանցերից մեծ քանակությամբ գնում են, տանում են իրենց խանութներում ավելի բարձր գնով վաճառում, մենք էլ փոքր խանութներին չենք տալիս, տալիս ենք միայն մեծ խանութներին, որ սպառողները կարողանան ճիշտ գնով վերցնել, հակառակ դեպքում՝ փոքր խանութները չենք կարողանում վերահսկել»,-ասաց նա:

Սերգեյ Ստեփանյանը նշեց, որ մինչ այս առկա թանկացումը կապված է եղել կերի գների և էներգառեսուրսների գների բարձրացման հետ: «Նոյեմբերից մինչև փետրվարի վերջ ձուն թանկացել է մոտավոր 20 տոկոսով, ամենաքիչը ձուն է թանկացել: Ցավոք սրտի, շուկայում ամեն օր գնափոփոխություն է լինում բոլոր ապրանքների տեսակետից, և որքան հնարավոր է, աշխատում ենք վերահսկել ձվի շուկան»,-ասաց նա և նշեց, որ այլ երկրներում՝ Ռուսաստանում, Վրաստանում, ձվի շուկայում գների շատ բարձրացում է եղել և Ռուսաստանում, անգամ ձվի շուկան սուբսիդավորում է պետությունը, որ թանկացում չլինի, իսկ Հայաստանում նման բան չկա: «Երեք տարի է՝ կարողանում ենք պահել շուկան, հիմա ներկրում ոչ մի տեղից չկա, որովհետև ճանապարհները փակ են»,-հայտնեց նա:

Թռչնաբույծների միության նախագահը, անդրադառնալով Սուրբ Զատկին ձվի սպառմանը, հայտնեց, որ պահանջարկը ամբողջովին կարողանալու են բավարարել: «Առաքիչներն այս շրջանում ձգտում են գումար աշխատել և խուճապ են տարածում, թե ձու չի լինելու, թանկանալու է, իսկ մենք սպառողներին կոչ ենք արել, որ խուճապի չմատնվեն, ձվի գների բարձրացում չի նախատեսվում, մենք ամեն ինչ անում ենք, որ ձվի գինը չբարձրանա: Մենք կոչ ենք անում, որ քաղաքացիները Զատիկից առաջ շատ ձու չգնեն, նույնիսկ մարտի վերջին ավելանալու է ձվի քանակը, և այդ դեպքում ոչ մի թանկացում հնարավոր չէ: Օրը 3200 արկղ ձու ենք բաց թողնում շուկա և եթե բազմապատկեք 360-ով, կստանաք մի միլիոնից ավելի»,-ասաց նա:--յ