Ֆինլանդիայում համայնքային ընտրությունները կորոնավիրուսի պատճառով տեղափոխվել են ամառ
Ֆինլանդիայում համայնքային ընտրությունները ապրիլից տեղափոխվել են հունիս՝ երկրում կորոնավիրուսի հետ կապված իրավիճակի պատճառով: Այս մասին շաբաթ օրը Twitter- ում հայտարարել է Ֆինլանդիայի արդարադատության նախարարությունը, փոխանցում է ՏԱՍՍ-ը:
«Ֆինլանդիայի քաղաքական կուսակցությունների քարտուղարները հանդիպել են արդարադատության նախարար Աննա-Մայա Հենրիքսոնի հետ: Ինը կուսակցություններից ութը պաշտպանել են համայնքային ընտրությունները հունիս տեղափոխելը: Ընտրությունները տեղի կունենան հունիսի 13-ին»,- ասվում է հաղորդագրության մեջ: Հենրիքսոնը, իր հերթին, պարզաբանել է, որ տեղափոխման պատճառը կորոնավիրուսի հետ կապված իրավիճակի վատթարացումն է:
Ֆինլանդիայում կորոնավիրուսով վարակման դեպքերի թիվը մեկ օրում ավելացել է 648-ով եւ շաբաթ օրը հասել է 61 552-ի:
Ընդհանուր առմամբ, հանրապետությունում 767 մարդ է մահացել վարակի հետեւանքով առաջացած բարդություններից: Ավելի քան 3 միլիոն բնակիչ կորոնավիրուսի հայտնաբերման թեստ է հանձնել: Վարակվածների թվի ամենամեծ օրական աճը (840) գրանցվել է 2020 թվականի դեկտեմբերին: Բացի այդ, հանրապետությունում հայտնաբերվել է կորոնավիրուսի նոր շտամերով վարակման 1295 դեպք: COVID-19-ի դեմ պատվաստանյութի առաջին դոզան արդեն ստացել է 450 000 մարդ: