Սյունիք Փաշինյանի տապալված այցից հետո իշխանության հրահանգով ճանապարհային ոստիկանները սյունեցիներին տեռորի են ենթարկում, համայնքների սուբսիդավորումն էլ կտրել են. Վահե Հակոբյան (տեսանյութ)
Իշխանության ագրեսիվ և ոչ ադեկվատ դրսևորումները պայմանավորված են վախով, դա պարզ է նույնիսկ ցանկացած սկսնակ հոգեբանի. եթե այդքան պոտենցիալ ունեք, որ կարող եք կին լրագրողի Եռաբլուրում անվայել պատասխան տալ, ինչո՞ւ չեք հակադարձում թշնամուն, որն ամեն օր ծաղրում է մեզ, այդ ֆոնին այս ապաշնորհ իշխանությունը գործում է այն մարդկանց դեմ, որոնք հակադարձում են ադրբեջանական քարոզչությանը: «Արմնյուզ» ՀԸ «#ՕրաԽնդիր» հաղորդման ժամանակ երեկ նման կարծիք է հայտնել Սյունիքի նախկին մարզպետ Վահե Հակոբյանը:
«Պոպուլիզմի ամենավատ դրսևորումներից մեկն է, երբ այդ անձինք փորձում են իրենք իրենց արդարացնել։ Վազգեն Սարգսյանի եղբայրը սովոր է նրա անվան շվաքի տակ ապրել, թերևս դա է նրան պաշտպանել տարաբնույթ երևույթներից։ Կարծում եմ՝ շատ շուտով նա դուրս կգա եղբոր անվան շվաքից, մենք տեսնում ենք նրա իրական դեմքը։ Վարչապետն այսօր Եռաբլուր չբարձրացավ, փակել էին Վազգեն Սարգսյան փողոցն ու հարակից տարածքը, դա բերել էր քաղաքացիների արդարացի վրդովմունքի։ Մեկն ասաց՝ երբ քո գլուխը զրահապատ մեքենայից հանես, կլսես՝ ինչ հայհոյանքներ են տալիս քեզ, թվացյալ լեգիտիմությունն ի՞նչ արժե»,- ասել է նախկին մարզպետը:
Ըստ Հակոբյանի՝ այս իշխանությունն ինչպես Արցախի, այնպես էլ Սյունիքի էջը փակված է համարում, նրանք կա՛մ կատարյալ հիմար են, կա՛մ դավաճան, բայց քանի որ անցած երեք տարում որևէ լավ արդյունք չի գրանցվել, ավելի ճշմարտանման է միտումնավոր դավաճանությունը. «Սյունիքը կարող է վաղը հանձնեն, հայկական կողմը մատը մատին չի տալիս, իսկ ադրբեջանցիները նոյեմբերի 9-ից ինժեներական աշխատանքներ են կատարում։ Նրանք երեկ ևս մեկ հենակետ են դրել։ Սրանք ասում են՝ իբր Սյունիքն անվտանգ է, բայց Կապան-Գորիս ճանապարհին ունենք ընդամենը մեկ հենակետ, իսկ ադրբեջանցիները հայկական պետհամարանիշով մեքենայով Շուռնուխի կամ Որոտանի մոտով, Գորիսը շրջանցելով, Տաթևով կարող են հասնել Երևան, նրանց որևէ հենակետում չեն կանգնեցնի, ի՞նչ անվտանգություն»:
Նախկին մարզպետի կարծիքով՝ թշնամին սահմանի երկայնքով հոգեբանական տեռորի մեջ է պահում սյունեցիներին, ռուս սահմանապահները չեն կարող բոլոր տեղամասերը հսկել. «Թշնամին երրորդ երկրների կազմակերպությունների անունից հողատարածքներ է գնում Սյունիքում, անարյուն հայաթափում է անում։ Այս տեմպերով մեկ-երկու տարում կարող են ամբողջապես հայաթափել։ Սյունիքը հիմնված է եղել տուրիզմի, գյուղատնտեսության և հանքարդյունաբերության վրա։ Տուրիզմն այսօր իսպառ վերացել է, գյուղատնտեսություն չկա՝ արոտավայրերի ու հողատարածքների 80 տոկոսը մնացել է թշնամու կրակի տակ, հանքարդյունաբերությունն էլ են ուզում վերացնել՝ Զանգեզուրի պղնձամոլիբդենային կոմբինատի նկատմամբ ոտնձություններ են իրականացնում, փորձում են այդ հիմնարկը կանգնեցնել»:
Նախկին մարզպետի պնդմամբ՝ հանգամանքներն ի մի բերելիս ստացվում է, որ սա պետական դավաճանության մեծ ծրագիր է: «Իշխանության նենգության աստիճանը տեսեք՝ Սյունիք Փաշինյանի տապալված ակցիայից հետո նա կարգադրեց այնտեղ ուղարկել ՃՈ 15 պարեկային ուղեկալ՝ քաղաքացիներին տեռորի ենթարկելու համար, ամեն մանր հարցով կանգնեցնում են, տուգանքների տակ են գցում, դա տևեց երկու ամիս։ Երբ Ավինյանը եկել էր, քաղաքապետերը հրաժարվեցին հանդիպել նրան, կտրեցին համայնքների սուբսիդավորումը։ Կապան-Գորիս ավտոճանապարհին ցանկացած մեկին կարող են գերեվարել։ Սյունեցի պատգամավորները գոնե մեկ անգամ եկե՞լ են, տեսե՞լ են՝ ինչ վիճակ է»,- ամփոփել է Վահե Հակոբյանը: