Սկզբում այդ դերում տեսնում էին Նեմցովին, հետո` Պրիմակովին. քաղտեխնոլոգը պատմել է Ելցինի կողմից իր իրավահաջորդի ընտրության մանրամասները. Lenta.ru
Քաղտեխնոլոգ Գլեբ Պավլովսկին, որը համագործակցում էր Կրեմլի հետ Բորիս Ելցինի նախագահության երկրորդ ժամկետում, բացահայտել է նախկին նախագահի կողմից իր իրավահաջորդի ընտրության մանրամասները: Այս մասին նա պատմել է lenta.ru-ին տված հարցազրույցի ընթացքում:
«(Չափանիշները) միայն Բորիս Նիկոլաևիչի գլխում էին: Մեր ընտրությունը ոչ մի դեր չի խաղացել: Դա Ելցինի ինքնիշխան որոշում էր, որտեղ չկային չափանիշներ, ամեն ինչ տեղի է ունեցել առանց իշխանության այլ ներկայացուցիչների հետ համաձայնեցման»,-ասել է Պավլովսկին:
Նա ավելացրել է, որ սկզբում, 1997 թվականին, իրավահաջորդի դերում տեսնում էին Բորիս Նեմցովին: «Մենք զբաղվում էինք նրան գովազդելով, և արդեն 1997-ի ամռանը նրա վարկանիշը գերազանցել էր (Գենադի) Զյուգանովի վարկանիշը: Բայց հետո նրա դեմ պատերազմ սկսվեց հեռուստատեսությունը վերահսկող երկու մեդիաօլիգարխների` (Վլադիմիր) Գուսինսկիի և (Բորիս) Բերեզովսկիի կողմից: Մոտ մեկ տարի անց նրանք ոչնչացրել էին նրան որպես նախագահի թեկնածու»,-ասել է Lenta.ru–ի աղբյուրը:
Պավլովսկին ասել է, որ այդ ժամանակ Ելցինը սկսել է որոնումն ուժայինների շարքերում ՝ «խելացի ուժայինների», որոնցից առաջինը Եվգենի Պրիմակովն էր, որը 1990-ականներին ղեկավարում էր Արտաքին հետախուզության ծառայությունը:
«Պարզվեց, որ այս խելացի ուժայինը շատ հաջող «գտածո» էր: Նա արագորեն հանրաճանաչ դարձավ և իրեն Ելցինից անկախ պահեց: Վերջինիս դա դուր չէր գալիս»,-բացատրել է քաղտեխնոլոգը:
Ելցինը երկրի ղեկը ստանձնել է 1991 թվականին: 5 տարի անց նա վերընտրվել է երկրորդ ժամկետով: 1999 թվականի դեկտեմբերի 31-ին քաղաքական գործիչը հայտարարել է իր հրաժարականի մասին և նախագահի ժամանակավոր պաշտոնակատար նշանակել այն ժամանակվա վարչապետ, Անվտանգության դաշնային ծառայության նախկին տնօրեն Վլադիմիր Պուտինին: