Ադրբեջանի ԶՈՒ-ն շարունակում է կրակոցներ արձակել Սյունիքի մարզի գյուղերի հարևանությամբ․ ապացույցներ կան. Արման Թաթոյան
Սահմանային խնդիրները կարգավորելիս առաջնային պայման են մարդու իրավունքները: Այս մասին ասուլիսի ընթացքում ասաց մարդու իրավունքների պաշտպան Արման Թաթոյանը:
«Մարդու իրավունքների միջազգային ուժով ճանաչված՝ սահմանների հետ կապված բոլոր գործընթացների հիմքում պետք է լինեն մարդու իրավունքները, ընդ որում սա ոչ թե այլընտրանքային պահանջ է, այլ պարտադիր պահանջ է, տվյալ հարցում մարդու իրավունքները հիմք են»,- ասաց Արման Թաթոյանը:
Մարդու իրավունքների պաշտպանը նաև անդրադարձավ մի քանի կետերի, որոնց պահպանումը կարևոր պայման է և պետք է ստեղծվեին նախապես հանձնաժողովային մարմիններ, որոնք կհամակարգեին այդ կարգավիճակը:
«Միջազգային սկզբունքներից են պարտադիր կիրառման ենթակա՝ հարգանք սահմանային բնակիչների ու նրանց պաշտպանվածության նկատմամբ, սահմանային բնակիչների բնակականոն կյանքի ապահովում, անվտանգություն և խաղաղություն, բավարար տեղեկություններ: Այս ամենը պետք է ապահովվի հանձնաժողովային մասնագիտացված աշխատանքներով, որոնք պետք է իրականացվեն նախապես»,- ասաց Թաթոյանը:
Արման Թաթոյանը նաև նշեց՝ Սյունիքում և Գեղարքունիքում կան մարդկային արժանապատվության կոպիտ խախտումներ, և կյանքի իրավունքի իրավական վտանգներ:
«Սյունիքում և Գեղարքունիքում կան մարդկային արժանապատվության կոպիտ ոտնահարումներ, կյանքի իրավունքի իրական վտանգներ, դուք տեսաք՝ ինչ կրակոցներ են լսվում Սյունիքի անմիջական հարևանությամբ, ֆիզիկական և հոգեբանական անձեռնմխելիության իրավունքի կոպիտ խախտումներ, օրինակ՝ Ներքին Հանդ գյուղը, Շուռնուխը, Որոտանը, ոչ-ոք չի փորձում հասկանալ՝ ինչ վիճակում են այնտեղի երեխաները, արդյո՞ք որևէ մեկը կարող է ասել, որ սա երեխաների համար կյանքի լավագույն պայմաններն են»,- ասաց մարդու իրավունքների պաշտպանը:
Արման Թաթոյանը նաև ընդգծեց՝ առկա են սեփականության իրավունքի կոպիտ խախտումներ, մարդիկ չեն կարողանում իրենց օրինական փաստաթղթերը ձեռքին բնակվել իրենց տանը, քանի որ կան մի շարք խնդիրներ:
«Առկա են սեփականության իրավունքի կոպիտ խախտումներ, օրինակ՝ մարդիկ օրինական փաստաթղթերը ձեռքներին չեն կարողանում օգտվել իրենց սեփականությունը հանդիսացող տարածքներից, քանի որ դրանք ադրբեջանական են, իսկ մյուս իրավիճակը՝ կան հողեր և տներ, որոնք գտնվում են ուղիղ նշանառության տակ, և մարդիկ պարզապես չեն կարողանում այ հողերն օգտագործել, կրակոցներ են արձակվում»,- ասաց Թաթոյանը:
Ադրբեջանական ցուցանակների տեղադրումը նույնպես մարդու իրավունքների խախտում է:
«Ադրբեջանական դրոշների ու ցուցանակների տեղադրումը նույնպես մարդու իրավունքների խախտում է: Այս ցուցանակների մոտ բերում են իրենց զինվորականներին, տեղակայում են այդ ցուցանակների մոտ, որ իբր թե հայերը այդ ցուցանակները չվնասեն: Ակնհայտ չէ՞, որ սա պատրվակ է նրանց զինվորականների տեղաշարժման համար»,- ասաց Արման Թաթոյանը:
Մարդու իրավունքների պաշտպանը նաև ընդգծեց՝ Սյունիքի մարզում դպրոցները շատ մոտ են սահմանին, կա ճանապարհային խնդիր` ի՞նչ է լինելու ավտովթարի դեպքում, մարդիկ երեկոյան ժամերին վախենում են հիվանդանոց գնալ:
«Օրինակ՝ Կապանից Շիկահող, Սրաշեն, Ճակատեն, Ներքին Հանդ գյուղերում մարդիկ խուսափում են անգամ երեկոյան ժամերին հիվանդանոց գնալ: Ի՞նչ կլինի, եթե այդ ճանապարհների վրա ավտովթար լինի, չէ որ մարդկանց հորդորում են այդ տարածքում արագ քշել, ո՞վ է լուծելու հայերին առնչվող հարցերը: Այս հարցերը մենք բարձրաձայնում ենք և սպասում ենք լուծումների, այս հարցերին չկա լուծում: Դպրոցները շատ մոտ են սահմաններին և ամենավառ օրինակը Ներքին Հանդ գյուղն է, դպրոցը և սահմանը մոտ 500 մետր տարբերության վրա են»,- ասաց մարդու իրավունքների պաշտպանը:
ՄԻՊ-ը հավելեց՝ կան ապացույցներ, որ Ադրբեջանի զինված ուժերը կրակոցներ են արձակում ՀՀ Սյունիքի մարզի խաղաղ բնակավայրերի անմիջական հարևանությամբ։ Թաթոյանը ցուցադրեց մի տեսանյութ, որտեղ երևում է, թե ինչպես են Ադրբեջանի զինված ուժերը կրակոցներ արձակում ՀՀ Սյունիքի մարզի Կապան համայնքի Ագարակ և Եղվարդ գյուղերի միջնամասում օրվա ցերկային ժամերին։ Պաշտպանը նշեց, որ այդ հատվածից մինչև Ագարակ և Եղվարդ գյուղերը ուղիղ գծով մոտ 1 կմ է։
«Մենք ունենք այլ ապացույցներ ևս, որոնք հաստատում են ադրբեջանական զինված ուժերի արձակած կրակոցները»,- ասաց Թաթոյանը։
Ադրբեջանում հայատյացությունը հասել է իր գագաթնակետին. Արման Թաթոյան