«Նա այդ նպատակով նույնիսկ նոր մարզակոշիկներ է ստացել». աշխարհի ամենատարեց մարդը՝ 118-ամյա ճապոնուհին, կկրի Օլիմպիական ջահը
Աշխարհի ամենատարեց մարդը` Ճապոնիայի 118-ամյա բնակչուհին, պատրաստվում է մայիսին կրել Ճապոնիայում կայանալիք Օլիմպիական խաղերի ջահը, գրում է CNN-ը։
Կանե Տականան, որի մոտ երկու անգամ քաղցկեղ է ախտորոշվել և որը վերապրել է երկու համավարակ, ջահը կվերցնի այն ժամանակ, երբ այն կանցնի Շիմեով՝ Ֆուկուոկա պրեֆեկտուրայում, որտեղ ինքն ապրում է։
Չնայած նրան, որ Տականան հիմնականում տեղաշարժվում է անվասայլակով, ճապոնացի կինը վճռական որոշում է կայացրել, որ ջահը կրելիս կքայլի։ Ինչպես նշում է CNN-ը, ճապոնուհին միջոցառման համար ընտանիքի կողմից նոր սպորտային կոշիկներ է ստացել՝ հունվարին իր ծննդյան օրը, երբ բոլորել է 118 տարին։
Տանական ծնվել է 1903 թվականին։ Նա չորս երեխա ունի։ Իր ողջ կյանքի ընթացքում ճապոնուհին աշխատել է բրնձի խանութում և թոշակի է անցել միայն 103 տարեկանում: Նա ունի հինգ թոռ և ութ ծոռ:
Տանական ականատես է եղել երկու համաշխարհային պատերազմներին և 1918 թ.-ի իսպանական գրիպի համավարակին։
Տոկիոյում վերջին Օլիմպիական խաղերն անցկանցվել են 1964 թ.-ին, երբ Տանական 61 տարեկան էր: Խաղերի թե՛ ամառային, թե՛ ձմեռային հաշվարկներով՝ այս տարվա Խաղերը նրա կյանքի 49-րդն են լինելու:
Այժմ Տականան ապրում է ծերանոցում, որտեղ սովորաբար արթնանում է առավոտյան ժամը 6-ին և հաճույք է ստանում «Օթելլո» խաղից: Տանակայի ընտանիքը, որը Covid-19 համավարակի ընթացքում 18 ամիս շարունակ չի կարողացել այցելել նրան, ասել է, որ հետաքրքրասիրությունը պահպանելը և մաթեմատիկայով զբաղվելը նրա միտքը սուր և մարմինն առողջ պահելու գաղտնիքներն են:
Ըստ Գինեսի ռեկորդների գրքի՝ Տանական համարվում է աշխարհի ամենատարեց մարդը։
Հիշեցնենք՝ Օլիմպիական ջահը կրողների նախորդ ռեկորդակիրների թվում են բրազիլացի Աիդա Գեմանկեն, որը ջահը վառել է 2016 թվականին Ռիոյի ամառային խաղերի ժամանակ` 106 տարեկանում, և սեղանի թենիսիստ Ալեքսանդր Կապտարենկոն, որը ջահով վազել է 2014 թ. Սոչիի ձմեռային խաղերում՝ 101 տարեկանում։