Այսքան ժամանակ թուլացումից հետո խստացումները ըմբոստության առիթ են դառնալու, ոչ ոք չի ենթարկվելու, այն էլ՝ այս անկայուն քաղաքական իրավիճակում. Լ. Մանուկյանը՝ դիմակ կրելու խստացմանը վերադառնալու մասին

Դիմակների կրումն ու համավարակի դեմ պայքարի միջոցներն առհասարակ չպետք է թուլանային և հիմա հայտարարություն լիներ դրանք խստացնելու մասին, քանի որ ի սկզբանե ասվել է՝ համավարակի երրորդ ալիք ևս լինելու է: Հիմա այդ երրորդ ալիքն է և այսքան ժամանակ թուլացումից հետո խստացումները ընդվզումների առիթ են դառնալու, այն էլ՝ քաղաքական այս իրավիճակում: Այս մասին Tert.am-ի հետ զրույցում ասել է բժիշկ-թերապևտ, Ներքին հիվանդությունների բժշկության հայկական ասոցիացիայի նախագահ Լամարա Մանուկյանը` խոսելով Առողջապահության նախարարի՝ դիմակ կրելու խստացմանը վերադառնալու հայտարարության մասին:

Հիշեցնենք, որ այսօր Կառավարության նիստի ժամանակ առողջապահության նախարար Անահիտ Ավանեսյանն ասել էր, որ որ վերջին օրերին վարակման թվերը աճում են և ավելի կաճեն մարտի 8-ին շարժի ակտիվացման պատճառով։ Նախարարը նշել է, որ պետք է վերադառնալ դիմակները խիստ կրելուն։

«Այո, մենք կանխատեսում էինք, որ գարնան սկզբին համավարակի երրորդ ալիք կլինի, որովհետև գարնանը սրանում են շնչառական բոլոր վարակները: Իմ կանխատեսմամբ՝ երրորդ ալիքն ավելի թույլ կլինի, քան առաջինը, սակայն, բնականաբար, այդ սահմանափակումները պետք է պահպանվեին»,-ասաց նա:

Բժիշկ-թերապևտը նշեց, որ երրորդ ալիքի ժամանակ կարող են նաև վարակվել նախկինում վարակակիր եղածները, և անտերբեր լինելն ավելի կվտանգի վիճակը: «Հիմա հասկացան, որ վիճակը կարող է բարդանալ, նորից խստացումների են գնում»:

Հարցին, թե նոր նախարարի և նրա կողմից տարվող աշխատանքների արդյունքում մենք կունենա՞նք այն պատկերը, որը եղավ նախորդ տարի, Մանուկյանը պատասխանեց՝ իր կարծիքով՝ այո, նույնն պատկերն է լինելու, պարզապես այն տարբերությամբ, որ բժիշկներն արդեն ավելի հմուտ են կորոնավիրուսի բուժման հարցում, ավելի լավ են ճանաչում վիրուսը, ու երրորդ ալիքի հաղթահարումն ավելի թեթև կանցնի:

«Պարզապես պետք չէր իրավիճակն այդքան բաց թողնել, հանրահավաքներ անել, պատերազմի ժամանակ դիմակ չէին կրում, Արցախից մարդիկ ջերմությամբ էին գալիս: Այսինքն, սկսվեց անտարբեր վերաբերմունք համավարակի դեմ պայքարի նկատմամբ ու բոլորը հարցնում էին՝ վե՞րջ, էլ դիմակ չենք կրո՞ւմ: Հիմա, այս բաց թողած իրավիճակից հետո սահմանափակումների խստացումը ըմբոստություն կառաջացնի մարդկանց մեջ ու որևէ արդյունավետություն չի ունենա: Սա կառավարման սխալների արդյունք է. ինչու թուլացնել, որ նորից գնանք խստացումների: Ոչ ոք չի ենթարկվելու, հատկապես, երկրի այսպիսի անկայուն, շերտավոր քաղաքական իրավիճակում պատկերացնո՞ւմ եք, թե դիմակի կրելու պահանջն ինչ կարող է դառնալ»,- շեշտեց Մանուկյանը: