Կորոնավիրուսային հիվանդացության աճ կա, պիտի վերադառնանք դիմակների և այլ կանխարգելիչ միջոցառումների խիստ պահպանմանը. նախարար (տեսանյութ)

Վերջին ընթացքում ունենք կորոնավիրուսային հիվանդացության աճ: Այս մասին Կառավարության նիստին հայտարարեց առողջապահության նախարար Անահիտ Ավանեսյանը:

Նրա տեղեկացմամբ՝ եթե հունվարին, փետրվարի սկզբին թեստավորումների 5-6 տոկոսի դեպքում էր հաստավում կորոնավիրուսը, այժմ հաստատվում է 16 տոկոսի դեպքում, հաջորդ շաբաթ էլ, ըստ ԱՆ կանխատեսումների, այդ թիվը կավելանա:

«Պիտի վերադառնանք դիմակների և այլ կանխարգելիչ միջոցառումների խիստ պահպանմանը: Եթե ուզում ենք պաշտպանել մեզ նոր սահմանափակումներից, պետք է ամեն բան անենք, որ կանխենք հիվանդության տարածումը»,- ընդգծեց նախարարը:

Նա նշեց, թե վերահսկողական մարմինները պետք է տրանսպորտում, առևտրային կենտրոններում, հյուրատներում հստակ հսկողություն իրականացնեն: Անդրադառնալով հիվանդանոցային ռեսուրսներին՝ Ավանեսյանը հայտնեց. «Այսօր արդեն իսկ սկսում ենք երկու հիվանդանոցների ծավալման աշխատանքները: Ներկայումս մենք ունենք 865 ծավալված մահճակալ, որոնցից զբաղված են 808-ը, հընթացս կավելացնենք մահճակալների թիվը»:

Ինչ վերաբերում է պատվաստանյութերին, Ավանեսյանն ասաց, թե դրանց ձեռքբերման աշխատանքներն ընթանում են, սակայն ընդհանուր պրոցեսների որոշակի դանդաղում կա. «Հույս ունենք, որ գարնան ընթացքում պիտի առաջին խմբաքանակն ունենանք, ռուսական կողմի հետ էլ առաջին խմբաքանակի հետ կապված բանակցություններն ավարտված են, պայմանագիրը կնքման փուլում է»,-ասաց նա: