«Մեր հարյուրավոր քաղաքացիներ կարող են ռազմական հանցագործությունների հետաքննության օբյեկտ դառնալ». Իսրայելի պաշտպանության նախարար
Իսրայելի գնահատականների համաձայն՝ երկրի հարյուրավոր քաղաքացիներ կարող են ռազմական հանցագործությունների հետաքննության օբյեկտ դառնալ Միջազգային քրեական դատարանի կողմից, որի իրավասությունը երկիրը մերժում է:
Reuters-ի հետ զրույցում նման տեսակետ է հայտնել երկրի պաշտպանության նախարար Բենի Գանցը։
Նշվում է՝ փետրվարին Միջազգային քրեական դատարանը որոշում էր կայացրել, ըստ որի՝ այն իրավասություն ունի գրավյալ Արևմտյան ափի, Գազայի հատվածի, ինչպես նաև արևելյան Երուսաղեմի նկատմամբ: Նշվում է՝ այս որոշումը կարող է հանգեցնել Իսրայելի ու պաղեստինցի զինյալների, այդ թվում՝ ՀԱՄԱՍ-ի դեմ քրեական հետաքննության:
Իսրայելը Միջազգային քրեական դատարանի անդամ չէ, երկիրը մերժում է դրա իրավասությունը, և այս դիրքորոշմանը սատարում է նրա մերձավոր դաշնակիցը՝ Ամերիկայի Միացյալ Նահանգները: Ինչ վերաբերում է պաղեստինցիներին, ապա նրանք ողջունել են այս որոշումը՝ որպես իսրայելական հարձակումների զոհերի համար արդարության հնարավորություն:
Երկրի ՊՆ նախարարի խոսքով՝ այս որոշումը «բացասական իրադարձություն» է:
«Մենք ունենք մեր սեփական թիմերը, որոնք աշխատում են տարբեր վայրերում, որպեսզի փորձեն ազդել դատարանի վրա»,- հայտնել է նա։
Հիշեցնենք՝ Գանցը զբաղեցրել է զինված ուժերի շտաբի պետի պաշտոնը 2014-ին Գազայի հատվածում Իսրայելի ու գրոհայինների միջև պատերազմի ժամանակ: Դատարանն այս հակամարտությունը ճանաչել է որպես պոտենցիալ խնդիր, որը պահանջում է հետաքննություն:
Այն հարցին, թե քանի իսրայելցու, այդ թվում` իրեն, կարող է ձերբակալություն սպառնալ, Գանցը նշել է, որ «մի քանի հարյուր, բայց իրենք բոլորի մասին հոգ կտանեն»:
Ըստ Գանցի՝ սա միայն «գնահատական է»։ Այնուամենայնիվ, քաղաքական գործիչը հրաժարվել է հայտնել, թե արդյոք Իսրայելը կազմել է պաշտոնատար անձանց ցուցակը: Նրա խոսքով՝ Իսրայելը իրավաբանական օգնություն կտրամադրի ներգրավված բոլոր իսրայելցիներին և անհրաժեշտության դեպքում կզգուշացնի նրանց: