ՆԱՏՕ-ի և ԵՄ-ի կողմնակիցները ներհայկական ճգնաժամում շանս են տեսնում. Взгляд-ն անդրադարձել է Մարուքյանի «խորամանկ» առաջարկին

Ռուսական Взгляд պարբերականն անդրադարձել է Հայաստանում ստեղծված քաղաքական ճգնաժամին՝ վերլուծելով «Լուսավոր Հայաստան» ընդդիմադիր կուսակցության առաջնորդ Էդմոն Մարությանի առաջարկը քաղաքական ճգնաժամից դուրս գալու մասին:

«Չնայած, որ Փաշինյանին տասնյակ անգամ «քաղաքական դիակ» են հայտարարել և նույնքան անգամ՝ «ազգային դավաճան», Փաշինյանը մտադիր է մնալ իշխանության ղեկին մինչև 2023 թվականի հաջորդ խորհրդարանական ընտրությունները, որոնցում մտադիր է հաղթել»,- նշում է հոդվածի հեղինակը՝ ուշադրություն հրավիրելով, այն հանգամանքի վրա, որ այս փուլում խորհրդարանական ընդդիմության ղեկավար Մարուքյանը նոր առաջարկով է հանդես եկել՝ «օրինական ճանապարհով» կարգավորելու ստեղծված իրավիճակը:

Ըստ Մարուքյանի առաջարկի՝ Փաշինյանը պետք է հրաժարվի ԳՇ պետին ազատելու մտադրությունից և հրաժարական ներկայացնի, սակայն կարող է մնալ վարչապետի ժամանակավոր պաշտոնակատար նախքան արտահերթ ընտրությունների անցկացումը:

«Վերջապես, իրադարձությունների նման զարգացումը, երբ Փաշինյանը միանշանակ և միակ հաղթողը չի լինի, կարծես թե պետք է ձեռնտու լիներ պաշտոնական Մոսկվային, քանի որ ՌԴ ղեկավարությունը համակրանք չի տածում Փաշինյանի հանդեպ… սակայն Մոսկվայի համար Մարուքյանը և «Լուսավոր Հայաստանը» իշխանության անթույլատրելի թեկնածու են՝ նույնիսկ Փաշինյանի ֆոնին»,- գրում է հեղինակը՝ պարզաբանելով, որ Մարուքյանի առաջարկած փոխզիջումային տարբերակն ավելի շատ խորամանկելու համար է. դրանով նրա կուսակցությունն ակնհայտորեն փորձում է մեծացնել իր ներկայությունը խորհրդարանում:

«Թվում է, թե խելամիտ առաջարկ է, սակայն կա խնդիր. այդ սխեման անհրաժեշտ է Հայաստանում ԵՄ-ի և ՆԱՏՕ-ի աջակցությունն ուժեղացնելու համար: Կարճ ասած՝ «Լուսավոր Հայաստան»-ը լիբերալներ են, որոնք ԵՄ-ի և ՆԱՏՕ-ի կողմնակիցներն են և հանդես են գալիս ՀԱՊԿ-ից ու ԵԱՏՄ-ից Հայաստանի դուրս գալու օգտին»,- շեշտում է հոդվածագիրը:

Վերջինս հավելում է, որ Մոսկվային նախևառաջ հետաքրքրում է Երևանի ստանձնած պարտավորվածությունների իրագործումն՝ ըստ Արցախյան պատերազմի ավարտին կնքված համաձայնագրի, քանի որ ռուսական կողմը մտադիր չէ ավելրոդ անգամ վտանգել խաղաղապահների կյանքը «ներհայկական վիճաբանությունների պատճառով, թե ով է մեղավոր»:

Հիշեցնենք, որ օրեր առաջ Գլխավոր շտաբը հանդես էր եկել հայտարարությամբ` պահանջելով վարչապետ Փաշինյանի և նրա կառավարության հրաժարականը։ Դրանից հետո Փաշինյանը հայտարարել է, որ ԳՇ պետ Օնիկ Գասպարյանին աշխատանքից ազատելու որոշում է կայացրել, որն ուղարկել է նախագահ Արմեն Սարգսյանին։ Սահմանված ժամկետում Արմեն Սարգսյանն այն չի ստորագրել։ Նիկոլ Փաշինյանը երկրորդ անգամ է այն ուղարկել նախագահին։ Եռօրյա ժամկետում նախագահը կամ պետք է ստորագրի, կամ ուղարկի ՍԴ։ Բարձր դատարանը, իր հերթին, դիմումը մուտքագրելու պահից տասնօրյա ժամկետում կայացնելու է որոշում։