Ժողովո՛ւրդ, սթափվեք, թուրքը մեր մեջ է, մի գնացեք սադրանքների, իրավիճակն արդեն անելանելի է․ պետք է համախմբվել ազգային գաղափարների շուրջ և ուղղել ազգի ողնաշարը. Աննա Մայիլյան

Հիմա երկիրը գտնվում է անդունդում, և հայ ազգը երբևէ այսքան պառակտված չի եղել, պետք է համախմբվել ազգային գաղափարների շուրջ և ուղղել ազգի ողնաշարը: Այս մասին ասուլիսի ընթացում ասաց ՀՀ վաստակավոր արտիստ, մեցցո-սոպրանո Աննա Մայիլյանը:

«Մեր ժողովուրդն այսչափ պառակտած երբևէ չի եղել, ու՞մ ենք ուրախացնում, թշնամու՞ն: Ժողովո՛ւրդ, սթափվեք, թուրքը մեր մեջ է, մի գնացեք սադրանքների, իրավիճակն արդեն անելանելի է, մենք պետք է միավորվենք մեր ազգային ամենակարևոր գաղափարների շուրջ, մենք իսկապես արդեն անասելի անդունդում ենք գտնվում և դուրս գալու փոխարեն, մեջքը ուղղելու փոխարեն՝ մենք զբաղված ենք ինչ-որ թաղային կռիվներով»,- ասաց Աննա Մայիլյանը:

Վաստակավոր արտիստը նաև անդրադարձավ այսօրվա երկու հանրահավաքներին՝ նշելով, որ դեմ է ժողովրդի բաժանմանը, և այն, ինչ կատարվում է հիմա, մանկապարտեզային քաղաքականություն է, իսկ ժողովուրդն արդեն մոռանում է՝ ինչ է եղել մի քանի ամիս առաջ:
«Ես դեմ եմ մեր ժողովրդին բաժանելու այս քաղաքականությանը, սա մանկապարտեզային տգետ քաղաքականություն է, և հիմա մեր ազգի մեջ կա մի բան, որը չի տեղավորվում մեր բանականության մեջ, ես չեմ հասկանում՝ ո՞նց կարելի է մոռանալ մեր երեխեքի մահը և պատերազմը տանուլ տալուց հետո հանգիստ ապրել»,- ասաց նա:

Աննա Մայիլյանը նաև նշեց՝ հիմա չկա ընդդիմություն, և Բաղրամյան պողոտայում հավաքված են մարդիկ, որոնք պարզապես մտահոգված են Հայաստանի ապագայով:
«Չկա ընդդիմություն, նրանք մարդիկ են, ովքեր մտահոգ են հայրենիքի ապագայով, ովքեր դեմ են թուրքամետությանը, և այդ մարդիկ պետք է ուժ կազմեն, բայց ես դեմ եմ խտրականությանը, հիմա մենք պետք է լինենք մեկ ազգ, և բոլորս պաշտպանեք մեր ազգի շահերը»,- հավելեց Մայիլյանը:

Աննա Մայիլյանը նաև կոչ արեց քաղաքացիներին չտրվել սադրանքներին և պայքարել ազգի արժանապատվության համար:

«Եթե մենք ունենք արժանապատվություն, մենք պետք է մանիպուլյացիաների չտրվենք, բոլոր ուժերը պետք է համախմբվեն ազգի արժանապատվությունը պահելու համար, ես չեմ ուզում, որ հիմա գնա աթոռի կռիվ, ես ուզում եմ՝ օրակարգում լինի հայրենիքի փրկության հարցը»,-ասաց նա: