«Զելենսկին քաղաքական գործունեությամբ չի զբաղվել, նա պարզապես զվարճացրել է ժողովրդին»․ ուկրաինացի փորձագետը` երկրի նախագահի վարկանիշի անկման մասին

Ուկրաինայի նախագահ Վլադիմիր Զելենսկիի վարկանիշն ընկել է պայմանավորված այն փաստով, որ ընտրողները նրա գործողություններում նախորդների քաղաքականությունից իրական տարբերություններ չեն տեսնում։ Այս մասին հայտնում է «ՌԻԱ Նովոստի» լրատվական գործակալությունը՝ հղում տալով «Գլավռեդ» պորտալում ուկրաինացի քաղաքական փորձագետ և տնտեսագետ Անդրեյ Գոլովաչովի հրապարակմանը:

Գոլովաչովի խոսքով՝ քաղաքական գործիչը իրական վարկանիշ է ունենում, երբ սկսում է գործնական քայլեր անել, իսկ հասարակությունը որոշ ժամանակ անց գնահատում է այդ գործողությունները:

«Ի՞նչ վարկանիշ կարող էր ունենալ Զելենսկին այն ժամանակ, երբ հայտարարել է, որ գնում է ընտրությունների: Ոչ մի, քանի որ նա քաղաքական գործունեությամբ չի զբաղվել, այլ պարզապես զվարճացրել է ժողովրդին և քաղաքական ուտոպիա ստեղծել», - նկատել է փորձագետը:

Նա ասել է, որ վերջին նախագահական ընտրություններում Զելենսկիի ստացած 73 տոկոս ձայնը «կարելի է համարել ցանկացած բան, բայց ոչ քաղաքական վարկանիշ»: Գոլովաչովը նշել է, որ մեկուկես տարի անց հասարակությունը համոզվել է, որ Զելենսկին ոչնչով լավ չէ «Տիմոշենկոյից», «Պորոշենկոյից» և այլ քաղաքական գործիչներից:

«Եվ երբ նա իսկապես իրական վարկանիշ էր ձեռք բերել, և բարձրացել այլ քաղաքական գործիչների մակարդակին՝ այլ կերպ չէր էլ կարող լինել, քանի որ Զելենսկին հրաժարվեց բարեփոխումներ անել, պայքարել կոռուպցիայի դեմ և արագորեն տեղավորվեց համակարգում ՝ դառնալով դրա մի մասը», - եզրափակել է փորձագետը։

Զելենսկին Ուկրաինայի նախագահ է դարձել 2019 թվականի գարնանը: Ընտրությունների առաջին փուլի արդյունքների համաձայն, նա բոլոր թեկնածուներից ամենաշատ ձայներն էր հավաքել (30,24 տոկոս) և երկու անգամ ավելի շատ, քան այն ժամանակ գործող նախագահ Պյոտր Պորոշենկոն: Ընտրությունների երկրորդ փուլում Զելենսկին հաղթել է՝ հավաքելով ձայների 73,22 տոկոսը: Արդեն 2020 թվականի դեկտեմբերին, ըստ «Ռեյտինգ» սոցիոլոգիական խմբի, Զելենսկիին նախագահական ընտրություններում կրկին կաջակցի հավանական ընտրողների ընդհամենը 27 տոկոսը: