Հույս ունեմ՝ նախագահը կիրականացնի իր սահմանադրական լիազորությունները և առարկություններով հետ կվերադարձնի ԶՈՒ ԳՇ պետին պաշտոնից ազատելու՝ վարչապետի առաջարկը. Արթուր Վանեցյան
Այս իշխանություններն ապիկար են, նրանք չեն կարողանում ոչինչ անել, եթե ես լինեմ իշխանության, կկարողանամ իմ աշխատանքի շնորհիվ վերադարձնել գերիներին, որևէ կասկած չունեմ, որ ճիշտ աշխատանքի դեպքում այդ հարցը կարելի էր լուծել շատ ավելի արագ: Այս մասին Բաղրամյան պողոտայում Tert.am-ի հետ զրույցում ասել է «Հայրենիք» կուսակցության նախագահ Արթուր Վանեցյանը:
Հարցին, թե առաջարակե՞լ է իր օգնությունը իշխանություններին, Վանեցյանը պատասխանել է՝ ինքն ասում է, որ եթե լինեն իշխանության, ապա կօգտվեն իշխանական լծակներից և կօգտագերծեն իրենց՝ տարիների ընթացում ձեռք բերված կապերը. «Կարող ենք այդ հարցը լուծել, բայց առանց պաշտոնապես Հայաստանի Հանրապետությունը ներկայացնելու ուղղակի հնարավոր չէ»:
Լրագրողի դիտարկմանը, թե Ալիևը հայտարարում է, որ այլևս ռազմագերի չկա, իսկ ովքեր, որ կան, դիվերսանտներ են, Վանեցյանը հիշեցրել է, որ նոյեմբերի 9-ի հայտարարության մեջ գրված էր, որ բոլոր ռազմագերիները, ժամանակավոր պահվող անձիք, առանց նախապայմանների պետք է բոլորը բոլորի դիմաց փոխանակվեն, ինչը տեղի չունեցավ, որին հաջորդեց ևս մեկ հանդիպում, որի ժամանակ մեզ հավաստիացնում էին, որ առաջին պայմանը գերիների վերադարձի պայմանն է, և եթե դա Ադրբեջանը չկատարի, ապա Հայաստանը որևէ փաստաթուղթ չի ստորագրի, սակայն եղավ հակառակը. «Ստորագրվեց Ալիևի և Փաշինյանի կողմից ևս մեկ փաստաթուղթ, որտեղ գերիների մասին որևէ խոք չկա: Փաշինյանը, վերադառնալով Հայաստան, արեց գրառում՝ «ցավոք գերիների հարցը հնարավոր չեղավ լուծել» և տվեց մոռացության»:
Հարցին՝ արդյո՞ք նախագահը կստորագրի Օնիկ Գասպարյանին ՀՀ ԶՈՒ ԳՇ պետի պաշտոնից ազատելու մասին Նիկոլ Փաշինյանի առաջարկությունը, Վանեցյանը պատասխանել է.
«Հույս ունեմ, որ նախագահը կիրականացնի իր սահմանադրական լիազորությունները և առարկություններով հետ կվերադարձնի վարչապետի այդ միջնորդությունը, որովհետև սա սովորական իրավիճակ չէ, այսքան մարդ դուրս է եկել փողոց, կանգնել է մեր երկրի հիմքերի պաշտպանության համար, երկրի հիմնական պաշտպանները՝ ՀՀ Զինված ուժերը հայտարարություն են արել, որ Նիկոլ Փաշինյանը այլևս ի վիճակի չէ ապահովվել երկրի անվտանգությունը և նա պետք է գնա: Ես կարծում եմ՝ նախագահն անպայման ականջալուր կլինի հայտարարությանը»:
Առավել մանրամասն՝ սկզբնաղբյուրում: