Համաշխարհային պաշտպանական ծախսերը 2020 թվականին ռեկորդային 1.83 տրիլիոն դոլարի են հասել

Համաշխարհային պաշտպանական ծախսերը 2020 թվականին ռեկորդային 1.83 տրիլիոն ԱՄՆ դոլարի են հասել` չնայած կորոնավիրուսային համավարակին եւ դրան հաջորդած 3.5 տոկոս անկմանը համաշխարհային տնտեսությունում: Այս մասին է վկայում Ռազմավարական հետազոտությունների Բրիտանական միջազգային ինստիտուտի (IISS) զեկույցը: 2019-ի համեմատ աճը 3.9 տոկոս է կազմել, փոխանցում է DW-ն:

ԱՄՆ-ն` 738 միլիարդ դոլար սպառազինության ծախսերով` թիվ 1-ն է IISS-ի ցանկում. ԱՄՆ-ին բաժին է ընկնում այդ նպատակների համար համաշխարհային ծախսերի գրեթե 40 տոկոսը: Չինաստանի ցուցանիշը զգալիորեն ցածր է` 193.3 միլիարդ դոլար: Միեւնույն ժամանակ, ասիական տարածաշրջանում ռազմական ծախսերի ընդհանուր աճը հիմնականում պայմանավորված է ՉԺՀ-ի պաշտպանական բյուջեի ավելացմամբ, ասվում է զեկույցում: Առավել զգալի ծախսերը կապված են չինական ռազմական նավատորմի վերազինման հետ, նշում են փորձագետները:

Ինչ վերաբերում է ՆԱՏՕ-ի եվրոպական անդամ երկրների պաշտպանական միջին ծախսերին, ապա դրանք վերջին վեց տարվա ընթացքում տոկոսային հարաբերակցությամբ անընդհատ աճել են համախառն ներքին արդյունքի նկատմամբ` 2014-ին ՀՆԱ-ի 1.25 տոկոսից մինչեւ 1.52 տոկոս 2019 թվականին, եւ անցյալ տարի հասել են 1.64 տոկոսի:

Այնուամենայնիվ, դա դեռ շատ ցածր է ՆԱՏՕ-ի նշաձողից, որի համաձայն դրա անդամները պետք է մինչեւ 2024 թվականն իրենց ՀՆԱ-ի 2 տոկոսը ծախսեն պաշտպանության վրա: Անցյալ տարի Հյուսիսատլանտյան դաշինքի միայն ինը երկրին հաջողվեց հասնել այդ նպատակին: