Լեոնիդ Կալաշնիկով. Երբեք Հայաստան չի գա հակառուսական ուժ: Նա մի քանի տարի առաջ փորձեց, բայց չստացվեց
Պետդումայի ԱՊՀ գործերով, եվրասիական ինտեգրման եւ հայրենակիցների հետ կապերի կոմիտեի նախագահ Լեոնիդ Կալաշնիկովի կարծիքով՝ Հայաստանում վերջին իրադարձությունները չեն անդրադառնա ՌԴ-ի հետ նրա հարաբերությունների վրա, որի պահպանման օգտին է հանդես գալիս հանրապետության բնակչության մեծամասնությունը, փոխանցում է ՏԱՍՍ-ը:
«Ինչ վերաբերում է մեր երկկողմ հարաբերություններին, իհարկե՝ չէինք ցանկանա, որ այդ տուրբուլենտությունը դրանց վրա անդրադառնար»,- ասել է պատգամավորը: Նա հիշեցրել է, որ անցած տարիներին նախկին ԽՍՀՄ երկրներում տարբեր փոփոխություններ են տեղի ունեցել, բայց «բոլոր իշխանափոխությունների եւ հեղափոխությունների ժամանակ, որոնք այնտեղ տեղի են ունեցել», նրանց մեծամասնությունը շահագրգռված է եղել Ռուսաստանի հետ հարաբերություններով:
«Հայաստանի համար դա հատկապես արդիական է, ցանկացած դեպքում այնտեղ երբեք չի գա որեւէ հակառուսական ուժ: Ավելի շուտ, այն փորձեց մի քանի տարի առաջ գլուխ բարձրացնել, բայց աջակցություն չստացավ»,- շարունակեց Կալաշնիկովը՝ հստակեցնելով, որ նկատի ունի արտասահմանից աջակցություն ստացող ՀԿ-ներին: Նրա խոսքով՝ միշտ կգտնվեն մարդիկ, որոնք կարող են Մոսկվային մեղադրել ինչ-որ բանում, «բայց Հայաստանի մեծ մասը շահագրգռված է Ռուսաստանի հետ բարեկամությամբ ու համագործակցությամբ»: