Մենք պատվիրակություն ենք ուղարկում ՀՀ նախագահի մոտ՝ երկրում ստեղծված իրավիճակը քննարկելու, բացի այդ մեկ ժամից այստեղ կլինեն վրաններ, վառարաններ, գիշերելու ենք էստեղ. Սաղաթելյան
Ազգային ժողովը նիստ չի գումարել, ԱԺ-ն շարունակում է մնալ ոչ իր դիրքերում: Այս մասին, այսօր՝ փետրվարի 25-ին, Բաղրամյան պողոտայում հանրահավաքի ժամանակ հայտարարեց «Հայրենիքի փրկության շարժման» համակարգող, ՀՅԴ ԳՄ ներկայացուցիչ Իշխան Սաղաթելյանը:
«Մենք քիչ հետո կհրապարակենք քաղաքական մեծամասնության պատգամավորների անունները, իրենք պարտավոր են ներկայանալ եւ հրավիրել ԱԺ նիստ: Երկրորդ, մենք պատվիրակություն ենք ուղարկում ՀՀ նախագահի մոտ՝ երկրում ստեղծված իրավիճակը քննարկելու եւ լուծումներ գտնելու շուրջ:
Երրորդ, նոր գլխավոր խելագարը հայտարարել է, որ եթե քաղաքական հայտարարությունները չափն անցնեն, կձերբակալեն: Եկեք բոլորս միասին ասենք՝ գլուխդ պատին կտաս, թե կարող ես մարդ ձերբակալել: Որեւէ մեկը չփորձի վախեցնել մեր ժողովրդին: Դուք պարտավոր եք հաշվի նստել ժողովրդի, բանակի հետ»,- ասաց նա:
Իշխան Սաղաթելյանը տեղեկացրեց, որ քիչ անց կբերեն վրաններ, վառարաններ, ջուր, թեյ, որ կարողանան ցրտին դիմանալ. «Պինդ կանգնում ենք, որ հասնենք մեր պահանջի կատարմանը: Հիմա ոստիկանները հետ են գնում, Դեմիրճյան փողոցի կողմից նստարաններով, աղբամաններով, բարիկադներով փակում ենք»:
«Մի ժամ հետո այստեղ կլինեն վրաններ, համապատասխան վառարաններ, բոլոր հնարավորությունները: Մնում ենք այստեղ: ԱԺ պատգամավորները հատ-հատ կամ գալիս են խորհրդարան, կամ մենք իրենց կբերենք խորհրդարան:
Սա գործողություն է, սրա տակ կա ծրագիր: Չենք գնում, մինչև չհեռացնենք»,- ասաց նա: